بھارت کے وزیر دفاع راج ناتھ سنگھ کا جرمنی میں ایک آبدوز کے دورے کے دوران دلچسپ اور وائرل لمحہ سامنے آ گیا، جب وہ جدید ٹائپ 212 کلاس روایتی آبدوز میں داخل ہونے کی کوشش کرتے ہوئے اس میں چند ثانیوں کے پھنس گئے۔
یہ واقعہ جرمنی میں ’ تھائی سن کروپ میرین سسٹمز‘ کی آبدوز سازی فیکٹری کے دورے کے دوران پیش آیا، جہاں راج ناتھ سنگھ نے جدید بحری ٹیکنالوجی کا معائنہ کیا اور ایک آبدوز کے اندر بھی گئے۔
ویڈیو میں دیکھا جا سکتا ہے کہ وزیر دفاع آبدوز کے تنگ اور گول دروازے (ہیچ) سے داخل ہونے کی کوشش کرتے ہیں، جہاں انہیں کچھ لمحوں کے لیے دشواری کا سامنا بھی کرنا پڑتا ہے، تاہم وہ کامیابی سے اندر داخل ہو جاتے ہیں، نیوز ڈاٹ اے زیڈ کے مطابق بھارتی میڈیا کے حوالے سے۔
یہ بھی پڑھیں:’سرحدیں بدل سکتی ہیں، سندھ کل بھارت کا حصہ بھی بن سکتا ہے‘، راجناتھ سنگھ کا متنازع بیان
یہ دورہ بھارت اور جرمنی کے درمیان دفاعی تعاون کا حصہ ہے، جس میں آبدوز ٹیکنالوجی، بحری جدید کاری اور اسٹریٹجک دفاعی شراکت داری پر بات چیت شامل ہے۔
تاہم اس مختصر سے مگر دلچسپ لمحے کی ویڈیو سوشل میڈیا پر وائرل ہو گئی ہے، جہاں صارفین اس پر مختلف تبصرے کر رہے ہیں۔
