خیبر پختونخوا کے ضلع کرم میں واقع پاراچنار ایئرپورٹ کو طویل عرصے بعد دوبارہ فعال کر دیا گیا ہے، جسے فرنٹیئر ورکس آرگنائزیشن اور پاکستان ایئرپورٹس اتھارٹی کی مشترکہ کاوشوں سے آپریشنل بنایا گیا۔
مزید پڑھیں: پاکستان ایئرپورٹس اتھارٹی نے فضائی کمپنیوں کو اہم ہدایات جاری کردیں
ایئرپورٹ کی مرمت اور اپ گریڈیشن کے بعد 26 اپریل کو پاک فوج ایوی ایشن نے آزمائشی پروازیں کیں تاکہ تعمیراتی معیار، رن وے کی فعالیت اور مجموعی آپریشنل تیاری کا جائزہ لیا جا سکے۔
حکام کے مطابق 6 کامیاب لینڈنگ اور ٹیک آف ٹرائلز مکمل کیے گئے، جس کے بعد رن وے کو پیشہ ورانہ معیار اور حفاظتی تقاضوں کے مطابق قرار دے دیا گیا۔ ان آزمائشوں کے دوران مختلف آپریشنل حالات میں ایئرپورٹ کی کارکردگی کا بھی تفصیلی جائزہ لیا گیا۔
کامیاب ٹرائلز کے بعد توقع ہے کہ پاراچنار ایئرپورٹ کی آپریشنل صلاحیت میں مزید بہتری آئے گی، جس سے علاقے میں فضائی رابطے، ہنگامی ردعمل اور معاشی سرگرمیوں کو فروغ ملے گا۔
یاد رہے کہ گزشتہ سال پاکستان انٹرنیشنل ایئرلائنز اور پاکستان ایئرپورٹس اتھارٹی کے حکام نے ایئرپورٹ کا دورہ کر کے کمرشل اور انسانی ہمدردی کی پروازوں کے لیے اس کی استعداد کا جائزہ لیا تھا۔
مزید پڑھیں: پاکستان کی فضائی حدود 10 مئی کو صبح 3:15 سے دوپہر 12:00 بجے تک عارضی طور پر بند رہے گی، ایئرپورٹس اتھارٹی
اس مقصد کے لیے ایک 8 رکنی کمیٹی بھی تشکیل دی گئی تھی، جس نے ٹرمینل بلڈنگ، رن وے، فائر اسٹیشن، رہائشی سہولیات اور دیگر آپریشنل ڈھانچے کا تفصیلی معائنہ کیا تھا۔
