محکمہ موسمیات پاکستان نے ملک کے جنوبی حصوں میں 29 اپریل سے 3 مئی تک ہلکی شدت کی ہیٹ ویو کا الرٹ جاری کردیا۔
محکمہ موسمیات کے مطابق 27 اپریل کی رات سے 29 اپریل تک جبکہ 3 سے 5 مئی کے دوران ملک کے بالائی علاقوں میں مغربی ہواؤں کا سلسلہ اثرانداز ہونے کا امکان ہے، جس کے باعث درجہ حرارت میں 2 سے 4 ڈگری سینٹی گریڈ تک کمی متوقع ہے۔
موسمی رپورٹ میں کہا گیا ہے کہ مئی سے جولائی کے دوران ’ایل نینو‘ کے حالات پیدا ہونے کا امکان ہے۔
’ایل نینو‘ ایک قدرتی موسمی عمل ہے جس کے تحت بحرالکاہل کے مرکزی اور مشرقی حصوں میں سطح سمندر کا درجہ حرارت بڑھ جاتا ہے، جس سے ہواؤں، دباؤ اور بارش کے نظام میں تبدیلی آتی ہے۔
ماضی میں یہی رجحان 2023 کو ریکارڈ کا دوسرا گرم ترین سال اور 2024 کو اب تک کا سب سے گرم سال بنانے میں معاون رہا۔
محکمہ موسمیات کے مطابق مئی اور جون سال کے گرم ترین مہینے شمار کیے جاتے ہیں، جبکہ جنوبی پنجاب، بالائی سندھ اور جنوبی و مشرقی بلوچستان ملک کے ہیٹ ویو سے متاثرہ علاقے ہیں جہاں درجہ حرارت بعض اوقات 52 ڈگری سینٹی گریڈ تک پہنچ جاتا ہے۔
رپورٹ میں بتایا گیا ہے کہ ان علاقوں میں مئی اور جون کے دوران درجہ حرارت عموماً 43 سے 45 ڈگری سینٹی گریڈ کے درمیان رہتا ہے، تاہم موجودہ صورتحال میں یہ معمول سے 2 سے 4 ڈگری زیادہ ریکارڈ کیا جا رہا ہے۔
محکمہ موسمیات نے کہا ہے کہ وہ صورتحال پر مسلسل نظر رکھے ہوئے ہے اور اگر ہیٹ ویو کی شدت میں اضافہ ہوا تو بروقت آگاہی جاری کی جائے گی۔
واضح رہے کہ اقوام متحدہ نے بھی گزشتہ ہفتے خبردار کیا تھا کہ ایل نینو کے دوبارہ وسط 2026 تک واپس آنے کا امکان ہے، جبکہ بعض موسمی ماڈلز کے مطابق یہ رجحان مئی تا جولائی کے دوران بھی سامنے آ سکتا ہے۔
اسی طرح نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے بھی ملک بھر میں 5 مئی تک شدید گرمی کی لہر سے متعلق الرٹ جاری کیا ہے۔
