معروف بزنس مین ایلون مسک کی جانب سے سماجی رابطے کے پلیٹ فارم ’ایکس‘ کو ایک جامع ’ایوری تھنگ ایپ‘ میں تبدیل کرنے کے منصوبے کے تحت جلد ایک نیا بینکنگ اور پیمنٹس سسٹم متعارف کرائے جانے کا امکان ہے۔
بلومبرگ کی رپورٹ کے مطابق ’ایکس منی‘ کے نام سے یہ مالیاتی فیچر ابتدائی طور پر محدود سطح پر آئندہ دنوں میں لانچ کیا جا سکتا ہے، تاہم اس کی راہ میں ریگولیٹری منظوری سے متعلق کچھ رکاوٹیں اب بھی موجود ہیں۔
رپورٹ میں بتایا گیا ہے کہ کمپنی پہلے ہی امریکا کی متعدد ریاستوں میں ضروری لائسنس حاصل کر چکی ہے، جبکہ گزشتہ سال ویزا کے ساتھ شراکت داری کا اعلان بھی کیا گیا تھا تاکہ ڈیجیٹل والیٹ اور پیئر ٹو پیئر ادائیگیوں کی سہولت فراہم کی جا سکے۔
اطلاعات کے مطابق اس پلیٹ فارم کے ذریعے صارفین کو مختلف مالی مراعات بھی دی جا سکتی ہیں، جن میں 6 فیصد منافع والا سیونگ اکاؤنٹ اور مخصوص ٹرانزیکشنز پر 3 فیصد کیش بیک شامل ہونے کا امکان ظاہر کیا جا رہا ہے۔
ایلون مسک نے 2023 میں ٹوئٹر کو ایکس میں تبدیل کرنے کے بعد یہ عندیہ دیا تھا کہ وہ اسے ایک ایوری تھنگ ایپ کے طور پر ترقی دینا چاہتے ہیں۔ انہوں نے یہ پلیٹ فارم 2022 میں حاصل کیا تھا۔
