پاکستان بار کونسل انضباطی کمیٹی کے زیرِ سماعت بہاولپور میں پلازہ کی تعمیر سے متعلق تنازعہ کیس میں سپریم کورٹ کے جج جسٹس محمد علی مظہر نے اہم تحریری فیصلہ جاری کرتے ہوئے واضح کیا ہے کہ دیوانی و فوجداری مقدمات میں مطلوبہ ریلیف نہ ملنے پر فیس واپسی کا کوئی قانونی تصور موجود نہیں۔
یہ بھی پڑھیں:27ویں آئینی ترمیم کے بعد سپریم کورٹ کا اہم فیصلہ: سپریم کورٹ اور وفاقی آئینی عدالت ہم پلہ قرار
عدالتی فیصلے میں کہا گیا ہے کہ وکیل کے خلاف پیشہ ورانہ بدعملی کے الزامات ثابت نہیں ہو سکے، جس کے باعث شکایت کو خارج کر دیا گیا۔
جسٹس محمد علی مظہر نے اپنے فیصلے میں قرار دیا کہ عدالتی و قانونی نظام میں ’ڈن بیسز‘ یعنی یقینی نتیجے یا ریلیف کی بنیاد پر مقدمات کا طے ہونا غیر قانونی اور غیر اخلاقی عمل ہے۔
فیصلے میں مزید کہا گیا ہے کہ وکیل ’آفیسر آف دی کورٹ‘ ہوتا ہے اور کسی بھی قسم کے ضمانتی نتائج فروخت کرنا پیشہ ورانہ اخلاقیات کے منافی ہے۔ عدالت نے قرار دیا کہ پاکستان کی تمام بار کونسلز کو چاہیے کہ وہ ایسے غیر اخلاقی طریقہ کار کے خاتمے کے لیے مؤثر قواعد و ضوابط وضع کریں۔
عدالت نے واضح کیا کہ مؤکل، وکیل سے صرف اس بنیاد پر فیس کی واپسی کا مطالبہ نہیں کر سکتا کہ اسے مطلوبہ ریلیف حاصل نہیں ہوا۔ وکیل کا کردار موکل کی جانب سے عدالت کی معاونت کرنا ہے، نہ کہ کسی نتیجے کی ضمانت دینا۔
فیصلے میں یہ بھی کہا گیا کہ غیر اخلاقی ڈیلز میں صرف وکیل ہی نہیں بلکہ مؤکل بھی برابر کا ذمہ دار تصور کیا جا سکتا ہے اور ایسے معاملات میں دونوں کے خلاف کارروائی کی گنجائش موجود ہے۔
یہ بھی پڑھیں:سپریم کورٹ نے باپ کے قاتل کو صلح نامہ کی بنیاد پر رہائی کا حکم دیدیا
عدالت نے اپنے ریمارکس میں کہا کہ وکلاء اور قانونی برادری عدالتی نظام کے وقار، آزادی اور انصاف کے اصولوں کے اصل محافظ ہیں، اور ان کے کردار کو ہر حال میں پیشہ ورانہ اخلاقیات کے مطابق رہنا چاہیے۔
یہ فیصلہ قانونی برادری میں “ڈن بیسز ریلیف کلچر” کے خلاف ایک اہم پیش رفت کے طور پر دیکھا جا رہا ہے۔
