سونے اور چاندی کی عالمی قیمتوں میں ریکارڈ اضافہ دوبارہ شروع ہونے کا امکان ظاہر کیا جا رہا ہے، کیونکہ ماہرین کے مطابق اگر امریکا اور ایران کے درمیان امن معاہدہ طے پا جاتا ہے تو عالمی مارکیٹ میں غیر یقینی صورتحال کم ہونے سے قیمتی دھاتوں کی طلب دوبارہ بڑھ سکتی ہے۔
سی این بی سی کی رپورٹ کے مطابق 2025 میں سونے اور چاندی نے غیر معمولی تیزی دکھائی تھی، جس کے دوران سونے کی قیمت میں 66 فیصد اور چاندی میں 135 فیصد اضافہ ہوا تھا۔ تاہم 2026 کے آغاز سے دونوں دھاتوں میں اتار چڑھاؤ بڑھ گیا ہے۔
یہ بھی پڑھیے: سونے کی قیمتیں نئی بلند ترین سطح پر پہنچ گئیں
رپورٹ کے مطابق حالیہ دنوں میں سونے کی سپاٹ قیمت میں 1.2 فیصد اضافہ ہو کر تقریباً 4750 ڈالر فی اونس تک پہنچ گئی، جبکہ چاندی کی قیمت میں بھی 3 سے 4 فیصد اضافہ ریکارڈ کیا گیا۔
ماہرین کا کہنا ہے کہ امریکا ایران جنگ کے باعث عالمی منڈیوں میں غیر یقینی صورتحال، تیل کی قیمتوں میں اضافہ اور امریکی ڈالر کی مضبوطی نے سونے کی ‘محفوظ سرمایہ کاری’ کی حیثیت کو متاثر کیا تھا، جس سے قیمتوں میں کمی دیکھنے میں آئی۔
میٹلز ڈے کے سی ای او راس نارمن کے مطابق جنگ کے دوران سونا زیادہ خریدا گیا تھا، جس کے بعد سرمایہ کاروں نے منافع لینے کے لیے فروخت شروع کی، اور یہی وجہ ہے کہ مارکیٹ میں عارضی کمی آئی۔
ماہرین کے مطابق اگر امن معاہدہ ہو جاتا ہے تو سرمایہ کار دوبارہ سونے اور چاندی کی طرف رجوع کریں گے، جس سے قیمتوں میں نئی تیزی آسکتی ہے۔
یہ بھی پڑھیے: مسلسل کمی کے بعد سونے کی قیمتوں میں نمایاں اضافہ، فی تولہ قیمت کتنی ہو گئی؟
بی این پی پریباس فورٹس کے چیف اسٹریٹیجی آفیسر نے کہا کہ قیمتی دھاتوں کا طویل المدتی رجحان اب بھی مثبت ہے اور یہ ممکن ہے کہ رواں سال کے دوران سونا اور چاندی نئی بلند ترین سطحوں کو چھو لیں۔
ماہرین کے مطابق مرکزی بینکوں کی جانب سے سونے میں سرمایہ کاری اور صنعتی شعبے میں چاندی کی بڑھتی ہوئی طلب بھی اس رجحان کو تقویت دے رہی ہے۔
