عالمی مالیاتی ادارے (آئی ایم ایف) کے ایگزیکٹو بورڈ نے پاکستان کے قرض پروگرام کے تازہ جائزے کی منظوری دے دی ہے جس کے بعد ملک کو تقریباً 1.2 ارب ڈالر کی نئی مالی معاونت حاصل ہوگی۔
یہ بھی پڑھیں: آئی ایم ایف نے آئندہ مالی سال کے بجٹ میں بجلی سبسڈی کی اجازت دے دی
وزیر خزانہ محمد اورنگزیب نے جمعے کو اس پیشرفت کی تصدیق کرتے ہوئے کہا کہ منظوری کے بعد پاکستان کو ایکسٹینڈڈ فنڈ فیسیلٹی (ای ایف ایف) کے تحت تقریباً ایک ارب ڈالر جبکہ ریزیلینس اینڈ سسٹین ایبلٹی فیسیلٹی (آر ایس ایف) کے تحت تقریباً 21 کروڑ ڈالر تک رسائی حاصل ہوگی۔
اس منظوری کے بعد دونوں پروگراموں کے تحت پاکستان کو ملنے والی مجموعی رقم تقریباً 4.5 ارب ڈالر تک پہنچ جائے گی۔
آئی ایم ایف کی جانب سے یہ فیصلہ ایسے وقت میں سامنے آیا ہے جب پاکستان زرمبادلہ کے ذخائر مستحکم کرنے، مہنگائی پر قابو پانے اور معیشت کو مستحکم کرنے کی کوششوں میں مصروف ہے۔
مزید پڑھیے: پاکستان اور آئی ایم ایف کے درمیان اسٹاف لیول معاہدہ طے پاگیا، 1.2 ارب ڈالر ملیں گے
پاکستان کو قرض پروگرام کے تحت محصولات بڑھانے، سرکاری اداروں کی نجکاری اور معاشی اصلاحات سے متعلق مختلف شرائط پر بھی عمل درآمد کرنا ہوگا۔
