کنگ سلمان ہیومینیٹیرین ایڈ اینڈ ریلیف سینٹر کے تحت پاکستان بھر میں جاری فوڈ سیکیورٹی سپورٹ پروجیکٹ 2025–26 کے پانچویں اور آخری مرحلے کی کامیاب تکمیل ہو گئی ہے، جسے ملک میں غذائی تحفظ کے فروغ کی جانب ایک اہم پیشرفت قرار دیا جا رہا ہے۔
مزید پڑھیں:کنگ سلمان ریلیف کی پنجاب میں 8 ہزار 500 مستحق خاندانوں میں غذائی پیکجز کی تقسیم
اس مرحلے کے دوران ملک کے 31 اضلاع میں مجموعی طور پر قریباً 195,487 افراد مستفید ہوئے۔ منصوبے کا مقصد غذائی قلت کا شکار اور مستحق خاندانوں کو بنیادی خوراک کی بروقت فراہمی یقینی بنانا تھا۔
رپورٹ کے مطابق امدادی سرگرمیاں پنجاب کے 10، خیبر پختونخوا کے 5، بلوچستان کے 7، سندھ کے 6 اور آزاد جموں و کشمیر کے 3 اضلاع میں انجام دی گئیں۔
اس مرحلے میں ہزاروں خاندانوں میں فوڈ پیکجز تقسیم کیے گئے، جن میں ہر پیکج کا وزن 97 کلوگرام تھا۔ پیکج میں 80 کلو آٹا، 5 لیٹر کوکنگ آئل، 5 کلو چینی، 5 کلو دال چنا اور 2 کلو کھجور شامل تھیں، جو مستحق افراد کی بنیادی غذائی ضروریات پوری کرنے میں معاون ثابت ہوئیں۔
یہ تمام سرگرمیاں نیشنل ڈیزاسٹر مینجمنٹ اتھارٹی، صوبائی و ضلعی ڈیزاسٹر مینجمنٹ اداروں اور مقامی شراکت دار تنظیموں کے تعاون سے شفاف اور منظم انداز میں مکمل کی گئیں۔
مزید پڑھیں:کنگ سلمان ریلیف سینٹر کی موسمِ سرما امدادی مہم کی پاکستان میں کامیاب تکمیل
حکام کے مطابق یہ منصوبہ پاکستان میں غذائی تحفظ کے فروغ اور کمزور طبقات کی مدد کے لیے کنگ سلمان ریلیف سینٹر کے دیرپا انسانی ہمدردی کے عزم کی عکاسی کرتا ہے۔
