ایپل نے آئی فون صارفین کے لیے آپریٹنگ سسٹم باضابطہ طور پر جاری کر دیا ہے جس میں نئی بڑی فیچرز کے بجائے کارکردگی بہتر بنانے، سیکیورٹی مضبوط کرنے اور مختلف تکنیکی مسائل دور کرنے پر توجہ دی گئی ہے۔
یہ بھی پڑھیں: ایپل کے آپریٹنگ سسٹم آئی او ایس 27 کے ممکنہ فیچرز سامنے آگئے، اے آئی پر توجہ مرکوز
نیا اپ ڈیٹ گزشتہ بڑے ورژنز آئی او ایس 26.4 اور آئی او ایس 26.5 کے مقابلے میں نسبتاً محدود نوعیت کا ہے تاہم یہ رواں سال کے اختتام تک متوقع آئی او ایس 27 کی تیاری کے لیے اہم بنیاد فراہم کرتا ہے۔
اسپاٹ لائٹ سرچ میں بہتری
آئی او ایس 26.6 میں شامل نمایاں تبدیلیوں میں سے ایک آئی فون کے اسپاٹ لائٹ سرچ انڈیکس کی پس پردہ بہتری ہے۔
ایپل کے مطابق یہ تبدیلی آئندہ آنے والے آئی او ایس 27 میں جدید اسپاٹ لائٹ سرچ اور سری کی نئی صلاحیتوں کے لیے ڈیوائسز کو تیار کرنے میں مدد دے گی۔
ایپل نے کچھ انڈیکسنگ کا عمل پہلے ہی مکمل کرنے کا انتظام کیا ہے تاکہ صارفین کو آئی او ایس 27 پر اپ گریڈ کرتے وقت زیادہ وقت لینے والی بیک گراؤنڈ پراسیسنگ کا سامنا نہ کرنا پڑے۔
بلاک کیے گئے رابطوں کے لیے نیا الرٹ
اس اپ ڈیٹ میں ایک مفید تبدیلی ان صارفین کے لیے بھی متعارف کرائی گئی ہے جو زیادہ تعداد میں رابطے بلاک کرتے ہیں۔
اگر کوئی صارف بلاک کیے گئے رابطوں کی مقررہ حد تک پہنچ جائے تو آئی او ایس 26.6 اب خاموشی سے مزید رابطے بلاک کرنے سے انکار نہیں کرے گا بلکہ بلاک کیے گئے رابطوں کی حد مکمل ہو گئی کا الرٹ دکھائے گا۔
اس کے بعد صارف کو کسی موجودہ بلاک کیے گئے رابطے کو ہٹانا ہوگا تاکہ نیا نمبر شامل کیا جا سکے۔
سیکیورٹی میں بڑی بہتری
ایپل نے آئی او ایس 26.6 میں آئی فون اور آئی پیڈ کے لیے 75 سے زائد سیکیورٹی مسائل کے حل شامل کیے ہیں جس کے باعث صارفین کو یہ اپ ڈیٹ جلد انسٹال کرنے کا مشورہ دیا جا رہا ہے۔ 
انٹرپرائز صارفین کے لیے بھی ایک اہم مسئلہ حل کیا گیا ہے، جس کا تعلق ڈس ایبل ایسوسی ایشن میک رینڈمائزیشن پالیسی سے ہے۔ اس سے ادارے اپنے زیرِ انتظام ڈیوائسز پر پرائیویٹ وائی فائی ایڈریس سیٹنگز کو بہتر انداز میں نافذ کر سکیں گے۔
آئی او ایس 27 کی تیاری
آئی او ایس 27 اس وقت ڈویلپرز اور عوامی بیٹا پروگرام میں دستیاب ہے جس کے باعث امکان ظاہر کیا جا رہا ہے کہ آئی او ایس 26.6، آئی او ایس 26 سیریز کا آخری بڑا اصلاحی اپ ڈیٹ ہو سکتا ہے۔
آئی او ایس 26.6 کیسے انسٹال کریں؟
صارفین اپنے آئی فون میں سیٹنگز > جنرل > سافٹ ویئر اپ ڈیٹ میں جا کر نیا اپ ڈیٹ ڈاؤن لوڈ کر سکتے ہیں۔
ایپل کے مطابق یہ اپ ڈیٹ صارفین کو بہتر کارکردگی، زیادہ محفوظ تجربہ اور آئندہ نسل کے آپریٹنگ سسٹم آئی او ایس 27 کے لیے بہتر تیاری فراہم کرے گا۔
