قومی کرکٹ ٹیم کے فاسٹ بولر شاہین شاہ آفریدی نے بنگلہ دیش کے خلاف پہلے ٹیسٹ میچ میں ایک اہم اعزاز اپنے نام کرتے ہوئے ورلڈ ٹیسٹ چیمپیئن شپ کی تاریخ میں نئی مثال قائم کردی۔
پاکستان اور بنگلہ دیش کے درمیان جاری 2 ٹیسٹ میچوں کی سیریز کے پہلے میچ میں بائیں ہاتھ کے تیز گیند باز نے بنگلہ دیش کی پہلی اننگز کے دوران 3 وکٹیں حاصل کیں۔
اوپنر محمود الحسن جوائے کو آؤٹ کرتے ہی شاہین آفریدی ورلڈ ٹیسٹ چیمپیئن شپ میں 100 وکٹیں مکمل کرنے والے پہلے پاکستانی کرکٹر بن گئے۔
انہوں نے یہ سنگ میل صرف 28 میچوں میں عبور کیا۔ پاکستانی بولرز میں ان کے بعد نعمان علی کا نمبر آتا ہے، جنہوں نے 20 میچوں میں 89 وکٹیں حاصل کر رکھی ہیں۔
ورلڈ ٹیسٹ چیمپیئن شپ میں سب سے زیادہ وکٹوں کا ریکارڈ آسٹریلوی بولر ناتھن لائن کے پاس ہے، جنہوں نے 55 میچوں میں 224 شکار کیے۔
دوسرے نمبر پر پیٹ کمنز ہیں جن کے نام 54 میچوں میں 222 وکٹیں ہیں، جبکہ مچل اسٹارک 52 میچوں میں 221 وکٹوں کے ساتھ تیسرے نمبر پر موجود ہیں۔
