عیدالاضحیٰ کے قریب آتے ہی کراچی کے علاقے گلستانِ جوہر میں چوری کی ایک حیران کن واردات نے شہریوں کو چونکا دیا جہاں نامعلوم افراد رات کی تاریکی میں 25 بکرے لے کر فرار ہوگئے۔
یہ واقعہ گلستانِ جوہر بلاک 8-اے میں پیش آیا جس کی سی سی ٹی وی فوٹیج بھی منظرِ عام پر آ چکی ہے۔ ملزمان موٹرسائیکل اور کار پر آئے اور موقع پاکر پلاٹ پر بندھے ہوئے قیمتی بکرے گاڑی میں منتقل کر کے فرار ہو گئے۔
یہ بھی پڑھیں: خاتون بیل کے بجائے اسکا برتن چوری کر کے لے گئی، ویڈیو وائرل
متاثرہ مالک نے واقعے کی رپورٹ ملیر کینٹ تھانے میں درج کرواتے ہوئے بتایا کہ چوری کیے گئے بکروں کی مالیت 19 لاکھ روپے سے زائد ہے۔ ان کے مطابق یہ جانور عیدالاضحیٰ کے موقع پر فروخت کے لیے لائے گئے تھے۔ واردات نے انہیں شدید مالی نقصان سے دوچار کر دیا۔
پولیس نے مقدمہ درج کر کے تفتیش کا آغاز کر دیا ہے اور سی سی ٹی وی فوٹیج کی مدد سے ملزمان کی شناخت اور گرفتاری کے لیے کوششیں تیز کر دی گئی ہیں۔
