سعودی ڈیٹا اینڈ آرٹیفیشل انٹیلیجنس اتھارٹی (SDAIA) کے سربراہ ڈاکٹر عبداللہ الغامدی نے وزارتِ داخلہ کے “مکہ روٹ انیشی ایٹو” میں شریک ٹیموں کی تکنیکی اور انجینئرنگ تیاریوں کا جائزہ لینے کے لیے ورچوئل اجلاس کی صدارت کی۔
سعودی خبر رساں ادارے کے مطابق وژن 2030 کے تحت جاری یہ پروگرام اب اپنے 8ویں سال میں داخل ہوچکا ہے اور اس وقت 10 ممالک کے 17 داخلی مقامات پر فعال ہے، جس کا مقصد حج کے لیے آنے والے زائرین کے سفری اور امیگریشن مراحل کو آسان اور تیز بنانا ہے۔
اجلاس کے دوران ڈاکٹر عبداللہ الغامدی نے حجاج کے اندراج اور آمد کے عمل کو مؤثر بنانے کے لیے تیار کیے گئے ڈیجیٹل انفرااسٹرکچر، جدید سسٹمز اور ورک اسٹیشنز کا تفصیلی جائزہ لیا۔
مختلف ممالک میں موجود ٹیموں نے اپنے مانیٹرنگ سسٹمز اور تکنیکی معاونت کے طریقہ کار پر بریفنگ دی، جبکہ متعلقہ اداروں کے ساتھ تیز رفتار ڈیجیٹل انضمام کو یقینی بنانے کے اقدامات بھی پیش کیے گئے تاکہ حجاج کرام کی رجسٹریشن اور آمد کا عمل بغیر کسی رکاوٹ کے مکمل ہوسکے۔
مزید پڑھیں:مکہ مکرمہ میں شجرکاری مہم: مزید 60 ہزار درخت لگ گئے، سبزہ زاروں میں 3 گنا اضافہ
سعودی حکام کا کہنا ہے کہ مصنوعی ذہانت اور جدید ڈیجیٹل ٹیکنالوجی کے استعمال سے حج آپریشنز کو مزید مؤثر، محفوظ اور منظم بنایا جا رہا ہے۔
