لاہور کے علاقے کوٹ لکھپت میں پولیس اہلکاروں کے مبینہ طور پر خواجہ سراؤں کے ذریعے شہریوں کو ہنی ٹریپ کرنے کا انکشاف ہوا ہے۔
جس کے بعد 4 خواجہ سراؤں اور 4 پولیس اہلکاروں کے خلاف مقدمہ درج کر لیا گیا۔
پولیس کے مطابق مقدمے میں نامزد چاروں اہلکاروں کو گرفتار کر لیا گیا ہے، جبکہ واقعے کی مزید تفتیش جاری ہے۔
یہ بھی پڑھیں: لاہور پولیس کا تھانے میں شہری پر تشدد کا واقعہ، پولیس اہلکار معطل، تحقیقات شروع
ایف آئی آر کے مطابق قصور سے تعلق رکھنے والے ایک شہری کو 2 خواجہ سراؤں نے جھانسہ دے کر کوٹ لکھپت میں واقع اپنے فلیٹ پر بلایا۔
جہاں دیگر ساتھیوں کے ہمراہ اسے مبینہ طور پر تشدد کا نشانہ بنایا گیا اور اس سے 40 ہزار روپے نقدی چھین لی گئی۔
شکایت کے مطابق ملزمان نے شہری کو تشدد کے بعد واش روم میں بند کر دیا۔
کچھ دیر بعد 4 پولیس اہلکار فلیٹ پر پہنچے اور خواجہ سراؤں نے شہری کو ان کے حوالے کر دیا۔
مزید پڑھیں: لاہور پولیس کی برق رفتار کارروائی، خاتون سے گاڑی چھیننے والے ملزمان گرفتار
ایف آئی آر میں کہا گیا ہے کہ پولیس اہلکاروں نے بھی شہری کو ڈرا دھمکا کر اس سے شناختی کارڈ کی کاپی اور 11 ہزار روپے نقدی حاصل کی۔
پولیس نے مقدمے میں نامزد کانسٹیبل وقاص، سلیمان، عمیر اور عرفان کو گرفتار کر لیا ہے، جبکہ ایس ایچ او کی جانب سے واقعے کی انکوائری بھی شروع کر دی گئی ہے۔
پولیس حکام کے مطابق ملزمان سے مزید تفتیش جاری ہے اور واقعے کے دیگر پہلوؤں کا بھی جائزہ لیا جا رہا ہے۔
