حکومت نے ایک بار پھر اپوزیشن کو مذاکرات کی پیشکش کردی ہے۔
وزیراعظم شہباز شریف کے مشیر برائے سیاسی امور رانا ثنااللہ نے سینیٹ میں اظہار خیال کرتے ہوئے کہاکہ وزیراعظم متعدد بار یہ کہہ چکے ہیں کہ حکومت اپوزیشن کے ساتھ مذاکرات چاہتی ہے۔
انہوں نے کہاکہ اپوزیشن جب بھی آمادگی ظاہر کرے، 24 گھنٹوں کے اندر وزیراعظم سے ملاقات ممکن بنائی جا سکتی ہے۔
رانا ثنااللہ نے کہاکہ بات چیت وہیں سے شروع ہوگی جہاں سے اپوزیشن چاہے گی۔
انہوں نے سینیٹر راجا ناصر عباس کو مخاطب کرتے ہوئے کہاکہ وزیراعظم کی پیشکش بدستور موجود ہے، اگر آپ اختیار رکھتے ہیں تو آگے بڑھیں۔
انہوں نے بانی پی ٹی آئی عمران خان اور ان کی اہلیہ بشریٰ بی بی کی صحت سے متعلق گفتگو کرتے ہوئے کہاکہ جیل قوانین میں ایسا کوئی ضابطہ موجود نہیں کہ بیماری کی صورت میں اہل خانہ کو بلایا جائے یا ان کی نگرانی میں علاج کروایا جائے۔
رانا ثنا اللہ کا کہنا تھا کہ بانی پی ٹی آئی عمران خان اور بشریٰ بی بی کو پاکستان میں دستیاب بہترین طبی سہولیات فراہم کی گئی ہیں۔
