سعودی عرب کا شمالی سرحدی علاقہ (ناردرن بارڈرز ریجن) ملک میں غذائی تحفظ اور دیہی ترقی کی حکمتِ عملی کا ایک مضبوط ستون بن کر ابھر رہا ہے۔ سعودی پریس ایجنسی (ایس پی اے) کی ایک حالیہ رپورٹ کے مطابق اس خطے میں مویشیوں کی مجموعی تعداد اب 75 لاکھ سے بھی تجاوز کر چکی ہے۔
سعودی عرب کی وزارتِ ماحولیات، پانی و زراعت کے علاقائی شعبے کی رپورٹ میں بتایا گیا ہے کہ ملکی سطح پر جانوروں کی پرورش، بالخصوص بھیڑوں کی افزائشِ نسل میں یہ علاقہ انتہائی اہم کردار ادا کررہا ہے۔
رپورٹ کے مطابق اس صوبے میں موجود مویشیوں کی کل تعداد میں 72 لاکھ بھیڑیں، 2 لاکھ 35 ہزار 814 بکریاں، 56 ہزار 925 اونٹ اور 308 گائے شامل ہیں۔ مقامی گلہ بانوں کا کہنا ہے کہ چھوٹے پیمانے پر مویشی پالنے والے کسانوں کے لیے حکومتی امداد نے پیداواری صلاحیت کو بہت بہتر بنا دیا ہے۔
حکومت کی جانب سے ان کسانوں کو ویٹرنری خدمات، حفاظتی ٹیکوں کی مہم اور تکنیکی مشاورتی پروگرام فراہم کیے جا رہے ہیں۔
ماحولیاتی ماہرین کا کہنا ہے کہ قدرتی چراگاہوں اور پانی کے وسائل پر موسمیاتی دباؤ کے باوجود دیہی ترقی کے لیے گلہ بانی کا شعبہ اب بھی مرکزی اہمیت رکھتا ہے۔ حکام کے مطابق حیاتیاتی تنوع کو بچانے اور نباتات کو تباہی سے روکنے کے لیے پائیدار چراہ گاہیں اور جدید انتظام ناگزیر ہو چکا ہے۔
یہ علاقائی ترقی سعودی عرب کے وسیع تر وژن 2030 کا حصہ ہے جس کا مقصد غذائی تحفظ کو مضبوط کرنا اور درآمدی گوشت پر انحصار کم کرنا ہے۔
سعودی عرب کے مجموعی لائیو اسٹاک کے اعداد و شمار پر نظر ڈالی جائے تو ملک بھر میں بھیڑوں کی کل تعداد تقریباً 2 کروڑ 21 لاکھ کے لگ بھگ ہے۔ اس کے علاوہ قومی سطح پر بکریوں کی تعداد 73 لاکھ اور اونٹوں کی تعداد 22 لاکھ 40 ہزار بتائی جاتی ہے۔
ملک میں گائے اور بھینسوں کی کل تعداد 5 لاکھ 16 ہزار ہے، جس میں سے 2 لاکھ 33 ہزار دودھ دینے والی گائے ریاض اور مشرقی صوبے کے بڑے کمرشل فارمز میں موجود ہیں۔
