ملک میں گدھوں اور خچروں سمیت دیگر مویشیوں کی تعداد میں اضافہ

پاکستان میں مویشیوں اور باربرداری کے جانوروں کی تعداد میں مسلسل اضافہ ریکارڈ کیا جا رہا ہے، جبکہ گدھوں کی آبادی بھی گزشتہ سال کے مقابلے میں مزید بڑھ گئی ہے۔

ادارہ شماریات کی جانب سے جاری کردہ تازہ دستاویزات کے مطابق ملک میں گدھوں کی تعداد میں ایک سال کے دوران ایک لاکھ 13 ہزار کا اضافہ ہوا، جس کے بعد ان کی مجموعی تعداد 60 لاکھ 47 ہزار سے بڑھ کر 61 لاکھ 60 ہزار تک پہنچ گئی ہے۔

اعداد و شمار کے مطابق بھینسوں کی تعداد میں بھی نمایاں اضافہ دیکھنے میں آیا ہے۔

گزشتہ ایک سال کے دوران 14 لاکھ 17 ہزار بھینسوں کا اضافہ ریکارڈ کیا گیا، جس سے ان کی مجموعی تعداد 4 کروڑ 76 لاکھ 88 ہزار سے بڑھ کر 4 کروڑ 91 لاکھ 5 ہزار ہوگئی۔

دستاویزات میں مزید بتایا گیا ہے کہ بھیڑوں کی تعداد میں 3 لاکھ 92 ہزار جبکہ بکریوں کی تعداد میں 24 لاکھ 22 ہزار کا اضافہ ہوا۔ اسی عرصے کے دوران اونٹوں کی تعداد 16 ہزار بڑھ گئی۔

دیگر جانوروں کے حوالے سے جاری اعداد و شمار کے مطابق گھوڑوں کی تعداد میں 3 ہزار جبکہ خچروں کی تعداد میں 4 ہزار کا اضافہ ریکارڈ کیا گیا ہے۔