’معرکہ حق‘ ٹی20 کرکٹ میچ پرائم منسٹر یوتھ پروگرام الیون نے سیلیبریٹیز الیون کو شکست دے کر اپنے نام کرلیا۔
افواجِ پاکستان کو خراجِ تحسین پیش کرنے کے لیے ’معرکہ حق‘ ٹی20 کرکٹ میچ کا انعقاد کیا گیا، جس میں رانا مشہود احمد، شاہد آفریدی سمیت شوبز اور دیگر شعبہ ہائے زندگی سے تعلق رکھنے والی معروف شخصیات نے شرکت کی۔
وفاقی وزیر اطلاعات و نشریات عطااللہ تارڑ بھی کرکٹ میچ میں موجود تھے اور تقریب میں خصوصی شرکت کی۔
میچ میں پرائم منسٹر یوتھ پروگرام الیون نے سیلیبریٹیز الیون کو 4 وکٹوں سے شکست دے کر کامیابی حاصل کر لی۔
سیلیبریٹیز الیون کی ٹیم مقررہ 20 اوورز میں 185 رنز بنا سکی، جس کے جواب میں پرائم منسٹر یوتھ پروگرام الیون نے ہدف حاصل کر کے میچ اپنے نام کر لیا۔
کرکٹ میچ میں اسپورٹس مین سپرٹ نمایاں رہی، عطااللہ تارڑ
وفاقی وزیر اطلاعات و نشریات عطااللہ تارڑ نے کرکٹ میچ کی تقریب سے خطاب کرتے ہوئے کہا کہ میچ میں اسپورٹس مین سپرٹ نمایاں رہی۔
انہوں نے کہاکہ دونوں ٹیموں نے بہترین کارکردگی کا مظاہرہ کیا اور شائقین کو اچھا مقابلہ دیکھنے کو ملا۔
عطااللہ تارڑ کا کہنا تھا کہ ہمیں اسی طرح کی اتحاد کی ہمیشہ ضرورت ہے۔
کامیاب اور رنر اپ ٹیموں میں ٹرافیاں تقسیم
تقریب کے اختتام پر کامیاب ہونے والی ٹیم سمیت رنر اپ ٹیم کو بھی ٹرافیاں دی گئیں، جبکہ شرکا نے کھیل کے ذریعے قومی یکجہتی اور افواجِ پاکستان سے اظہارِ یکجہتی کے جذبے کو سراہا۔
