وفاقی وزیر برائے ریلوے حنیف عباسی پر الزامات عائد کرنے والے شہری کے خلاف سینیٹ سیکیورٹی سارجنٹ کی مدعیت میں مقدمہ درج کر لیا گیا ہے۔
پولیس کے مطابق مقدمہ تھانہ سیکرٹریٹ اسلام آباد میں 2 سنگین دفعات کے تحت درج کیا گیا ہے۔
ایف آئی آر میں مؤقف اختیار کیا گیا ہے کہ ملزم نے بغیر اجازت ایک حساس مقام میں داخل ہو کر ممبر اسمبلی کے خلاف توہین آمیز ویڈیو ریکارڈ کی۔
مقدمے کے متن کے مطابق ملزم کی گاڑی کچھ وقت تک پارلیمنٹ ہاؤس کی عمارت میں موجود رہی، جبکہ اس کی جانب سے ریکارڈ کی گئی ویڈیو کو بھی تحقیقات کا حصہ بنایا گیا ہے۔
پولیس کا کہنا ہے کہ سینیٹ سیکیورٹی سارجنٹ کی مدعیت میں درج مقدمے کے بعد ملزم کی تلاش شروع کردی گئی ہے اور واقعے کے مختلف پہلوؤں کا جائزہ لیا جارہا ہے۔
قانون نافذ کرنے والے اداروں کے مطابق تحقیقات مکمل ہونے کے بعد مزید قانونی کارروائی عمل میں لائی جائے گی۔
