وزیر دفاع خواجہ آصف نے کہا ہے کہ جوائنٹ عوامی ایکشن کمیٹی آزاد کشمیر میں انتخابی عمل کو سبوتاژ کرنا چاہتی ہے۔
سماجی رابطے کی سائٹ ’ایکس‘ پر اپنے ایک بیان میں انہوں نے کہاکہ 27 جولائی کو آزاد کشمیر میں انتخابات ہونے جا رہے ہیں۔ ایکشن کمیٹی کا مطالبہ ہے کہ پاکستان سے منتخب ہونے مہاجرین کی 12 نشستیں ختم کردی جائیں، ایسا مطالبہ انتخابی عمل کو سبوتاژ کرنے کے مترادف ہے۔
27جولائ کو آزاد کشمیر کے الیکشن ھیں ۔ ایکشن کمیٹی ککا مطالبہ ھے کشمیر اسمبلی کی پاکستان سے منتخب ھونے والی 12 نشستیں ختم کی جائیں۔ الیکشن سے پہلے یہ مطالبہ انتخابی عمل کو سبو تاژ کرنے کے مترادف ھے۔ جمہوری سوچ کا تقاضا ھے کہ جو لوگ یہ مطالبہ کر رہے ھیں وہ اسکو 27جولائ کو عوام کے…
— Khawaja M. Asif (@KhawajaMAsif) June 5, 2026
انہوں نے کہاکہ جمہوری سوچ کا تقاضا ہے کہ یہ مطالبہ کرنے والے 27 جولائی کو عوام کے سامنے اپنا مؤقف رکھیں اور عوام کو فیصلہ کرنے دیں کہ نمائندگی کی شکل کیا ہونی چاہیے۔ یہی جمہوری طرزِ فکر ہوگا، بصورت دیگر اسے بلیک میلنگ تصور کیا جائے گا۔
خواجہ آصف نے کہا کہ سیالکوٹ شہر اور تحصیل کو آزاد کشمیر اسمبلی میں ایک نشست حاصل ہے جبکہ پاکستان کی قومی اسمبلی میں 2 نشستیں ہیں۔ پاکستان میں مقیم مہاجرین کے دیگر حلقے پاکستان بھر میں پھیلے ہوئے ہیں۔
ان کا کہنا تھا کہ ان علاقوں میں جموں سے تعلق رکھنے والے کشمیری مہاجرین کی بڑی تعداد آباد ہے، جو اکتوبر 1947 میں 2 لاکھ سے زیادہ جانوں کی قربانیوں، عزتوں کی پامالی اور ہزاروں بیٹیوں کے اغوا کے بعد ہجرت کرکے سیالکوٹ شہر اور تحصیل میں آکر آباد ہوئے۔
انہوں نے سوال اٹھایا کہ ان مہاجرین کو ان کے حقوق سے کیسے محروم کیا جا سکتا ہے۔
خواجہ آصف نے کہا کہ کئی دہائیوں تک یہ مہاجرین انتہائی غربت میں زندگی گزارتے رہے اور بنیادی سہولیاتِ زندگی سے محروم رہے۔ ان لوگوں نے آزادی کی خاطر بہت بڑی قیمت ادا کی ہے۔
انہوں نے کہا کہ اپنی رائے کو تسلیم کرانے کے لیے جمہوری راستہ اختیار کیا جانا چاہیے۔
واضح رہے کہ جموں و کشمیر جوائنٹ عوامی ایکشن کمیٹی نے 9 جون کو مظفرآباد کی جانب لانگ مارچ کا اعلان کررکھا ہے، جبکہ دوسری جانب الیکشن کمیشن نے 27 جولائی کو عام انتخابات کرانے کا اعلان کردیا ہے۔
