وزیراعلیٰ بلوچستان میر سرفراز بگٹی نے سول اسپتال کوئٹہ میں خاتون ڈاکٹر پر تیزاب حملے کے دوران بہادری کا مظاہرہ کرتے ہوئے ان کی جان بچانے کی کوشش کرنے والے وارڈ بوائے عبدالرزاق کو خراج تحسین پیش کیا ہے۔
وزیراعلیٰ بلوچستان نے مذکورہ شخص سے ٹیلیفون پر رابطہ کیا اور اس کے جرات مندانہ اقدام کو سراہتے ہوئے کہاکہ مشکل گھڑی میں انسانیت کی خاطر اپنی جان خطرے میں ڈالنا قابلِ ستائش عمل ہے۔
تیزاب گردی کے واقعے میں خاتون ڈاکٹر کی جان بچانے والے شخص کو وزیراعلیٰ بلوچستان کی شاباش، ٹیلیفونک گفتگو pic.twitter.com/7BYaGR9t1m
— WE News (@WENewsPk) June 7, 2026
انہوں نے کہاکہ ایسے لوگ معاشرے کا حقیقی سرمایہ ہیں جو دوسروں کی جان بچانے کے لیے آگے بڑھتے ہیں۔
وزیراعلیٰ بلوچستان کی جانب سے عبدالرزاق کو سول ایوارڈ دینے کا اعلان بھی کیا گیا ہے۔
واضح رہے کہ گزشتہ روز سول اسپتال کوئٹہ میں خاتون ڈاکٹر ڈاکٹر ماہ نور ناصر پر تیزاب پھینکا گیا تھا، جس کے نتیجے میں وہ شدید زخمی ہو گئیں۔
واقعے کی ویڈیوز میں ایک شخص کو فوری طور پر متاثرہ ڈاکٹر کی مدد اور انہیں بچانے کی کوشش کرتے دیکھا گیا، جس کے اقدام کو سوشل میڈیا پر بھی بھرپور پذیرائی حاصل ہوئی۔
وزیراعلیٰ بلوچستان میر سرفراز بگٹی نے واقعے کا نوٹس لیتے ہوئے متاثرہ ڈاکٹر کو علاج کے لیے کراچی منتقل کرنے کی ہدایت کی تھی، جبکہ حکومت کی جانب سے ان کے علاج کے تمام اخراجات برداشت کرنے کا اعلان بھی کیا گیا ہے۔
دوسری جانب پولیس کا دعویٰ ہے کہ خاتون ڈاکٹر پر تیزاب پھینکے والا ملزم پولیس مقابلے میں ہلاک ہوگیا ہے۔
