آزاد جموں و کشمیر پولیس نے کالعدم انتشاری کمیٹی کی جانب سے سوشل میڈیا پر کیے جانے والے دعوؤں اور پروپیگنڈے کو مسترد کرتے ہوئے کہا ہے کہ احتجاج چھوڑ کر اپنے گھروں کو واپس جانے کے خواہشمند شہریوں کو ڈرایا دھمکایا جا رہا ہے، تاہم پولیس انہیں مکمل تحفظ اور سفری سہولت فراہم کرے گی۔
ترجمان آئی جی آزاد جموں و کشمیر پولیس کے مطابق کالعدم جوائنٹ ایکشن کمیٹی معصوم افراد کو ورغلا کر اور مختلف لالچ دے کر راولاکوٹ لائی تھی، تاہم اب آزاد کشمیر کے مختلف اضلاع سے تعلق رکھنے والے افراد کمیٹی رہنماؤں کے مبینہ مجرمانہ کردار اور شرپسندانہ طرز عمل سے نالاں ہو کر احتجاج ختم کرکے اپنے گھروں کو واپس جانا چاہتے ہیں۔
ترجمان نے کہاکہ احتجاج چھوڑنے کے خواہشمند افراد کو کالعدم انتشاری کمیٹی کی جانب سے سوشل میڈیا اکاؤنٹس کے ذریعے دھمکیاں دی جا رہی ہیں تاکہ انہیں واپس جانے سے روکا جا سکے۔
انہوں نے واضح کیاکہ احتجاج ختم کرکے گھروں کو واپس جانے والوں کو گرفتار کیے جانے سے متعلق دعوے سراسر بے بنیاد، غلط، جھوٹے اور گمراہ کن پروپیگنڈا ہیں، جن کا حقیقت سے کوئی تعلق نہیں۔
ترجمان کے مطابق پولیس نے راولاکوٹ میں ایسے نوجوانوں اور افراد کی سہولت کے لیے خصوصی مراکز قائم کر دیے ہیں جو اپنے گھروں کو واپس جانا چاہتے ہیں، تاکہ ان کی حفاظت کو یقینی بنایا جا سکے اور انہیں سفری سہولت فراہم کی جا سکے۔
آئی جی آزاد جموں و کشمیر پولیس نے احتجاج چھوڑ کر واپس جانے والوں کے لیے سفری سہولت فراہم کرنے کا بھی اعلان کیا ہے۔
ترجمان نے مزید کہاکہ اپنے گھروں کو واپسی کے خواہشمند نوجوان پولیس سے رابطے میں رہتے ہوئے بلا خوف و خطر واپس جا سکتے ہیں اور پولیس ان کی حفاظت اور محفوظ واپسی کے لیے ہر ممکن اقدامات کرے گی۔
