پیٹرول ڈیزل سستا، ٹرانسپورٹرز نے بھی کرایوں میں بڑی کمی کا اعلان کر دیا

وزیراعظم محمد شہباز شریف کی جانب سے پیٹرولیم مصنوعات کی قیمتوں میں کی جانے والی تاریخی کمی کے ثمرات عوام تک پہنچنا شروع ہو گئے ہیں۔

پاکستان گڈز ٹرانسپورٹرز ایسوسی ایشن نے ڈیزل کی قیمتوں میں بڑی کٹوتی کا خیرمقدم کرتے ہوئے مال بردار گاڑیوں کے کرایوں میں فوری طور پر 15 فیصد کمی کا اعلان کر دیا ہے۔

یہ بھی پڑھیں:اسلام آباد پولیس کا شہریوں سے زیادہ کرایہ وصول کرنے والے ٹرانسپورٹرز کے خلاف کریک ڈاؤن

ایسوسی ایشن کے صدر نبیل محمود طارق نے اپنے ایک بیان میں کہا کہ وفاقی حکومت کی جانب سے ڈیزل کی قیمتوں میں نمایاں کمی کا فیصلہ انتہائی خوش آئند ہے، جس کے فائدے براہِ راست ملک کے معاشی نظام کو پہنچیں گے۔

کسانوں اور تاجر برادری کو بڑا ریلیف

نبیل محمود طارق نے ملک کی معاشی صورتحال پر گفتگو کرتے ہوئے واضح کیا کہ ماضی میں پیٹرولیم مصنوعات کی قیمتوں میں ہونے والے مسلسل اضافے کے باعث کسانوں سے لے کر انڈسٹری اور تجارت سے وابستہ کاروباری شخصیات شدید پریشانی کا شکار تھیں، جس سے مال برداری کی لاگت بھی بڑھ چکی تھی۔

نبیل محمود طارق نے کہا کہ ’ڈیزل اور پیٹرول کی قیمتوں میں اس بڑی کمی کے بعد اب ملک بھر میں مہنگائی کی شرح میں بھی نمایاں کمی کا قوی امکان ہے، جس کا فائدہ عام آدمی تک پہنچے گا۔‘

معیشت پر مثبت اثرات کی امید

ٹرانسپورٹ سیکٹر کے ماہرین کے مطابق، گڈز ٹرانسپورٹ کی جانب سے کرایوں میں 15 فیصد کمی کے بعد اب اشیائے ضروریہ، زرعی اجناس اور صنعتی خام مال کی ملک گیر ترسیل سستی ہو جائے گی۔

مزید پڑھیں:وزیراعلیٰ پنجاب مریم نواز کا پنجاب بھر میں ٹرانسپورٹرز کے خلاف کریک ڈاؤن کا حکم

اس اقدام سے نہ صرف مارکیٹ میں اشیا کی قیمتیں نیچے آئیں گی بلکہ پچھلے کئی ماہ سے مہنگائی کے بوجھ تلے دبی عوام کو بھی ایک بڑا اور پائیدار معاشی ریلیف مل سکے گا۔