سعودی عرب کی کابینہ نے پاکستان کے ساتھ فضائی نقل و حمل (ایئر ٹرانسپورٹ سروسز) کے نئے معاہدے کی منظوری دے دی ہے، جس سے دونوں ممالک کے درمیان فضائی رابطوں کو مزید فروغ ملنے کی توقع ہے۔
مزید پڑھیں:پاکستان اور سعودی عرب کے تعلقات مشترکہ تاریخ، اعتماد اور مذہبی وابستگی پر استوار ہیں، رحمان حیات
سعودی خبر رساں ایجنسی (SPA) کے مطابق اس معاہدے کی منظوری منگل کو جدہ میں ہونے والے کابینہ اجلاس میں دی گئی، جس کی صدارت خادم الحرمین الشریفین شاہ سلمان بن عبدالعزیز آل سعود نے کی۔
ایس پی اے نے سوشل میڈیا پلیٹ فارم ایکس پر جاری بیان میں کہا کہ سعودی عرب اور اسلامی جمہوریہ پاکستان کی حکومتوں کے درمیان فضائی نقل و حمل کی خدمات کے شعبے میں معاہدے کی منظوری دے دی گئی ہے۔
#مجلس_الوزراء: الموافقة على اتفاقية بين حكومة المملكة العربية السعودية وحكومة جمهورية باكستان الإسلامية في مجال خدمات النقل الجوي.#واس
— واس الأخبار الملكية (@spagov) June 23, 2026
پاکستان اور سعودی عرب اس سے قبل بھی فضائی نقل و حمل کے شعبے میں مختلف معاہدوں پر دستخط کر چکے ہیں۔ اگست 2023 میں دونوں ممالک نے ایک معاہدہ کیا تھا جس کا مقصد پروازوں کی تعداد میں اضافہ اور مسافروں کے لیے فضائی کرایوں میں کمی لانا تھا۔
نیا معاہدہ دونوں ممالک کے لیے خصوصی اہمیت کا حامل ہے کیونکہ ہر سال ہزاروں پاکستانی حج، عمرہ اور روزگار کے سلسلے میں سعودی عرب کا سفر کرتے ہیں۔
مزید پڑھیں:سعودی عرب نے ہمیشہ امن کو ترجیح دی، ڈاکٹر طلحہ الکشمیری
سعودی عرب میں 20 لاکھ سے زائد پاکستانی مقیم ہیں، جو ملازمت اور دیگر امور کے لیے دونوں ممالک کے درمیان باقاعدگی سے سفر کرتے رہتے ہیں۔
پاکستان حالیہ برسوں میں چین اور وسطی ایشیائی ریاستوں کے ساتھ بھی فضائی رابطوں کو وسعت دینے کی کوشش کر رہا ہے تاکہ دوطرفہ تجارت، سرمایہ کاری اور اقتصادی تعاون میں اضافہ کیا جا سکے۔
