پاکستان اور ترکیہ نے توانائی کے شعبے میں تعاون کو مزید مضبوط بنانے، تکنیکی مہارت کے تبادلے اور ادارہ جاتی روابط کو فروغ دینے کے لیے 3 اہم مفاہمتی یادداشتوں (ایم او یوز) پر دستخط کر دیے۔
یہ بھی پڑھیں: انسدادِ دہشتگردی تعاون مضبوط، پاکستان اور ترکیہ کی مشترکہ فوجی مشق اختتام پذیر
وزارت توانائی (پاور ڈویژن) کی جانب سے جاری بیان کے مطابق یہ معاہدے استنبول میں ہونے والے اعلیٰ سطحی مشاورتی اجلاس کے دوران طے پائے جن کا مقصد دونوں برادر ممالک کے درمیان توانائی کے شعبے میں طویل المدتی تعاون کو وسعت دینا ہے۔
مفاہمتی یادداشتوں پر پاکستان اور ترکیہ کے مختلف توانائی اداروں کے درمیان دستخط کیے گئے جن میں انڈیپنڈنٹ سسٹم اینڈ مارکیٹ آپریٹر اور انرجی ایکسچینج استنبول اور ترکش الیکٹرسٹی ٹرانسمیشن کارپوریشن جبکہ پاور پلاننگ اینڈ مانیٹرنگ کمپنی اور ترکش الیکٹرسٹی ڈسٹری بیوشن کارپوریشن شامل ہیں۔
ان معاہدوں کے تحت نجکاری کے بعد کے انتظامی ڈھانچے، بجلی کی منڈی کی ترقی، معاون خدمات کے ضوابط کی تشکیل، پاور سسٹم آپریشنز، ٹرانسمیشن منصوبہ بندی، تقسیم کار نظام کے انتظام، ڈیجیٹلائزیشن، استعداد کار میں اضافے، ادارہ جاتی مضبوطی اور تکنیکی مہارت کے تبادلے جیسے شعبوں میں تعاون کو فروغ دیا جائے گا۔
وفاقی وزیر توانائی سردار اویس احمد خان لغاری نے مفاہمتی یادداشتوں پر دستخط کا خیرمقدم کرتے ہوئے کہا کہ یہ شراکت داریاں پاکستان کے توانائی اداروں کو مضبوط بنانے کی جانب ایک اہم پیشرفت ہیں۔
انہوں نے کہا کہ پاکستان ترکیہ کے بجلی کی منڈی میں اصلاحات، ٹرانسمیشن سسٹم کی ترقی، تقسیم کار شعبے کی جدیدکاری اور توانائی کے شعبے میں جدید ٹیکنالوجی کے انضمام کے تجربات سے استفادہ کرنے کا خواہاں ہے۔
مزید پڑھیے: پاکستان اور ترکیہ کے درمیان قریبی روابط برقرار رکھنے پر اتفاق
سردار اویس لغاری نے نجکاری کے بعد کے فریم ورک اور نجی ماحول میں توانائی کے شعبے کے مؤثر انتظام سے متعلق ترکیہ کے تجربے کو بھی پاکستان کے لیے اہم قرار دیا۔
ان کا کہنا تھا کہ اداروں کے درمیان تعاون کے ذریعے عملی تجربات، آپریشنل مہارت اور بہترین طریقہ کار کا تبادلہ ممکن ہوگا، جس سے پاکستان کے توانائی کے شعبے میں کارکردگی خدمات کے معیار، گورننس اور پائیدار ترقی کو فروغ ملے گا۔
(1/3) وفاقی وزیر توانائی سردار اویس احمد خان لغاری نے استنبول میں ترکیہ کے وزیر توانائی و قدرتی وسائل ڈاکٹر الپ ارسلان بایراکتار اور پاکستان کے وزیر مملکت برائے نجکاری محمد علی کے ہمراہ پاور سیکٹر اصلاحات اور نجکاری کے عمل پر اعلیٰ سطحی مشاورت میں شرکت کی۔ pic.twitter.com/awozEc7RAO
— MOE- Power Division, Government of Pakistan (@MoWP15) June 25, 2026
ترک حکام نے بھی طویل المدتی ادارہ جاتی تعاون جاری رکھنے کے عزم کا اظہار کرتے ہوئے دونوں ممالک کے درمیان قریبی روابط کو خوش آئند قرار دیا۔
وزارت توانائی کے مطابق یہ معاہدے مشترکہ تکنیکی منصوبوں، ماہرین کے تبادلوں، تربیتی پروگراموں، مطالعاتی دوروں اور دیگر تعاون پر مبنی منصوبوں کی راہ ہموار کریں گے۔
مزید پڑھیں: پاکستان اور ترکیہ کے وزرائے خارجہ کی ملاقات، دوطرفہ تعلقات مضبوط کرنے پر اتفاق
بیان میں کہا گیا کہ یہ ایم او یوز پاکستان اور ترکیہ کے درمیان توانائی کے شعبے میں بڑھتی ہوئی اسٹریٹجک شراکت داری کا عملی مظہر ہیں اور دونوں ممالک کے توانائی مکالمے کا ایک اہم نتیجہ بھی ہیں۔
