امریکی فوڈ اینڈ ڈرگ ایڈمنسٹریشن نے سالمیونیلا بیکٹیریا کی ممکنہ آلودگی کے باعث مقبول برانڈز کے آلو کے چپس کو اپنے سب سے خطرناک وارننگ لیول یعنی کلاس اول واپسی کے تحت مارکیٹ سے واپس منگوانے کا اعلان کیا ہے۔
یہ بھی پڑھیں: وہ غذائیں جو آپ کے لیے نقصان کا باعث بن سکتی ہیں
حکام کے مطابق اس کیٹیگری کا مطلب یہ ہوتا ہے کہ ان اشیاء کے استعمال سے صحت کے شدید نقصانات یا موت واقع ہونے کا پورا امکان موجود ہوتا ہے۔
کون سے چپس متاثر ہوئے؟
متاثرہ چپس میں وہاں کے مشہور برانڈز زیپس اور ڈرٹی شامل ہیں۔ ان برانڈز کے مختلف ذائقوں جیسے نمک اور سرکہ، پیاز، اور پنیر والے مختلف سائز کے پیکٹس واپس منگوائے جارہے ہیں۔
واپسی کی وجہ کیا بنی؟
ان چپس کو تیار کرنے والی کمپنی نے بتایا کہ چپس میں استعمال ہونے والے مصالحے میں خشک دودھ کا پاؤڈر شامل تھا، جس میں سالمونیلا بیکٹیریا کی موجودگی کا شبہ ہے۔
اگرچہ استعمال سے پہلے کیے گئے ٹیسٹ منفی آئے تھے، لیکن کمپنی نے احتیاط کے طور پر یہ قدم اٹھایا ہے۔ اچھی بات یہ ہے کہ اب تک اس حوالے سے کسی کے بیمار ہونے کی کوئی رپورٹ سامنے نہیں آئی۔
سالمیونیلا کیا ہے اور اس کی علامات؟
یہ ایک ایسا بیکٹیریا ہے جو خوراک کے ذریعے پیٹ اور آنتوں کی شدید بیماریوں کا سبب بنتا ہے۔ آلودہ غذا کھانے کے چند گھنٹوں سے لے کر چھ دنوں کے اندر درج ذیل علامات ظاہر ہو سکتی ہیں:
شدید اسہال اور پیٹ میں مروڑ اٹھنا
بُخار، متلی اور قے آنا
زیادہ تر لوگ چند دنوں میں ٹھیک ہو جاتے ہیں، لیکن چھوٹے بچے، بوڑھے اور کمزور مدافعتی نظام والے افراد کے لیے یہ انفیکشن جان لیوا بھی ثابت ہوسکتا ہے۔
انتظامیہ اور چپس بنانے والی کمپنی نے شہریوں کو سخت ہدایت کی ہے کہ اگر انہوں نے یہ چپس خریدے ہیں تو انہیں فوری طور پر پھینک دیں یا دکان پر واپس کردیں۔
