آزاد کشمیر کے ضلع کوٹلی کے علاقے سرساوہ تا تراڑکھل سڑک کی کلیئرنس کے دوران کالعدم ایکشن کمیٹی کے مسلح شرپسندوں نے قانون نافذ کرنے والے اداروں پر فائرنگ کردی، جس کے نتیجے میں رینجرز اہلکار سپاہی شاہ نواز شہید جبکہ نائیک بلال شدید زخمی ہوگئے۔
ترجمان آزاد کشمیر پولیس کے مطابق شہید رینجرز اہلکار سپاہی شاہ نواز کا تعلق خیرپور سندھ سے ہے۔
ترجمان کے مطابق سڑکوں کی بندش کے باعث نظامِ زندگی اور آمدورفت شدید متاثر ہورہی ہے، جبکہ غذا کی قلت کے خدشات اور علاقہ مکینوں کے پرزور مطالبے پر بند راستوں کو کھولنے اور آمدورفت بحال کرنے کے لیے کلیئرنس آپریشن جاری ہے۔
آزاد کشمیر پولیس کے ترجمان نے بتایا کہ آپریشن کے دوران مختلف مقامات پر کالعدم ایکشن کمیٹی کی جانب سے کھڑی کی گئی رکاوٹیں ہٹائی جارہی ہیں۔
ترجمان کے مطابق تمام راستوں پر آمدورفت مکمل طور پر بحال ہونے تک کلیئرنس آپریشن جاری رہے گا۔
