وفاقی وزیر داخلہ محسن نقوی نے جدہ میں مکہ ریجن کے قائم مقام گورنر شہزادہ سعود بن مشعل بن عبدالعزیز سے ملاقات کی، جس میں پاکستان اور سعودی عرب کے درمیان تاریخی، برادرانہ اور دوطرفہ تعلقات کو مزید مضبوط بنانے کے عزم کا اعادہ کیا گیا۔
ملاقات کے دوران گورنر جدہ شہزادہ سعود بن عبداللہ بن جلوی، گورنر طائف شہزادہ سعود بن نہار بن سعود اور شاہی خاندان کی دیگر معزز شخصیات بھی موجود تھیں۔
یہ بھی پڑھیے وفاقی وزیر داخلہ محسن نقوی اہم سرکاری دورے پر ریاض پہنچ گئے، پرتپاک استقبال
اس موقع پر وفاقی وزیر داخلہ محسن نقوی نے عمرہ اور حج کے لیے سعودی حکومت کی جانب سے کیے گئے بہترین انتظامات کو سراہتے ہوئے قائم مقام گورنر مکہ ریجن کا خصوصی شکریہ ادا کیا۔ انہوں نے کہا کہ پاکستان سعودی عرب کے ساتھ اپنے دیرینہ برادرانہ تعلقات کو مزید وسعت دینے کا خواہاں ہے۔
قائم مقام گورنر مکہ ریجن شہزادہ سعود بن مشعل بن عبدالعزیز نے پاکستان کے ساتھ تعلقات کو انتہائی اہمیت دینے اور ہر ممکن تعاون جاری رکھنے کے عزم کا اظہار کیا۔
ملاقات میں کھیلوں کے شعبے میں تعاون پر بھی تبادلہ خیال کیا گیا۔ قائم مقام گورنر نے پاکستان کرکٹ بورڈ (پی سی بی) اور سعودی عرب کرکٹ فیڈریشن کے درمیان ہونے والے معاہدے کو خوش آئند قرار دیتے ہوئے اسے دونوں ممالک کے درمیان کھیلوں کے فروغ کی جانب اہم پیش رفت قرار دیا۔
یہ بھی پڑھیے پاکستان اور سعودی عرب کا جدہ میں بین الاقوامی کرکٹ اسٹیڈیم بنانے پر اتفاق، مفاہمتی یادداشت پر دستخط
انہوں نے جدہ میں پہلے بین الاقوامی معیار کے کرکٹ اسٹیڈیم کی تعمیر کے فیصلے کو بھی سراہا اور اپنے ریجن میں اسٹیڈیم کی تعمیر کے لیے پاکستان کرکٹ بورڈ کے ساتھ ہر ممکن تعاون فراہم کرنے کی یقین دہانی کرائی۔
