امریکا اور ایران کے درمیان جاری سفارتی کوششوں سے مشرق وسطیٰ میں کشیدگی کم ہونے کی امید پر عالمی منڈی میں خام تیل کی قیمتوں میں معمولی اضافہ ریکارڈ کیا گیا، جبکہ امریکی یومِ آزادی کی تعطیلات سے قبل سرمایہ کار محتاط رویہ اختیار کیے ہوئے ہیں۔
میڈیا رپورٹ کے مطابق جمعہ کو عالمی منڈی میں خام تیل کی قیمتوں میں معمولی اضافہ دیکھا گیا۔ برینٹ خام تیل کے فی بیرل سودے 17 سینٹ یا 0.24 فیصد اضافے کے ساتھ 72.10 ڈالر تک پہنچ گئے، جبکہ ویسٹ ٹیکساس انٹرمیڈیٹ خام تیل 14 سینٹ یا 0.20 فیصد اضافے کے بعد 68.83 ڈالر فی بیرل پر ٹریڈ ہوا۔
یہ بھی پڑھیں:ایران امریکا مذاکرات میں پیشرفت، تیل کی قیمتیں مسلسل تیسرے روز بھی گر گئیں
امریکی یومِ آزادی کی تعطیلات کے باعث جمعہ کو امریکی مالیاتی منڈیاں بند رہیں، جس کے باعث کاروباری سرگرمیاں بھی محدود رہیں۔ گزشتہ سیشن میں دونوں عالمی معیار کے خام تیل کی قیمتیں ایران پر امریکی اور اسرائیلی حملوں سے قبل کی سطح تک گر گئی تھیں، جبکہ ہفتہ وار بنیاد پر قیمتوں میں کئی ماہ کی کم ترین تبدیلی دیکھی گئی۔
مارکیٹ تجزیہ کار ٹِم واٹرر کا کہنا ہے کہ سرمایہ کار امن کی کوششوں کے کامیاب ہونے کے حوالے سے محتاط انداز میں پُرامید ہیں، تاہم وہ حتمی شواہد سامنے آنے تک مکمل اعتماد کے ساتھ سرمایہ کاری سے گریز کر رہے ہیں۔
میڈیا رپورٹ کے مطابق آبنائے ہرمز میں بحری آمدورفت بحال ہونے کے بعد خطے کے تیل پیدا کرنے والے ممالک نے برآمدات میں اضافہ شروع کر دیا ہے۔ کویت کی یومیہ تیل پیداوار جون میں بڑھ کر 16 لاکھ 50 ہزار بیرل ہو گئی، جو مئی میں صرف 5 لاکھ 80 ہزار بیرل یومیہ تھی۔
ادھر تجارتی ذرائع کے مطابق کم از کم 5 سپر ٹینکرز، جن میں ایک کروڑ بیرل سعودی خام تیل موجود تھا، آبنائے ہرمز عبور کر چکے ہیں، جبکہ سعودی آرامکو نے ایشیائی خریداروں کو تیل کی فروخت تیز کرنے کے لیے اسپاٹ قیمتوں کے تحت سپلائی شروع کر دی ہے۔
