بھارت کے شہر حیدرآباد میں 26 سالہ خاتون ایک ہوٹل کے کمرے میں پراسرار طور پر مردہ پائی گئی، جبکہ اہلِ خانہ نے واقعے کو خودکشی ماننے سے انکار کرتے ہوئے قتل کا شبہ ظاہر کیا ہے۔
بھارتی میڈیا رپورٹس کے مطابق متوفیہ، رینوکا، جمعرات کی شب گولکنڈہ کے رہائشی 34 سالہ شخص کے ہمراہ ایم ڈی لائنز کے قریب واقع ایک ہوٹل میں ٹھہری تھیں۔
یہ بھی پڑھیں: بھارتی ریاست گجرات میں کریڈٹ کارڈ فراڈ سے دلبرداشتہ ہوکر 3 افراد کی خود کشی، ملزم گرفتار
پولیس کے مطابق مذکورہ شخص نے بیان دیا کہ وہ کچھ دیر کے لیے کمرے سے باہر گیا تھا واپس آنے پر خاتون کو پھندے سے لٹکا ہوا پایا جس کے بعد فوری طور پر پولیس کو اطلاع دی گئی۔
ابتدائی تحقیقات میں معلوم ہوا ہے کہ خاتون نے رات گئے ہوٹل میں کھانا منگوایا تھا اور واقعے سے قبل اپنے ایک دوست سے ویڈیو کال پر بھی بات کی تھی۔ پولیس کے مطابق رات تقریباً 12 بج کر 24 منٹ پر ویڈیو کال جاری تھی جب یہ واقعہ پیش آیا۔
یہ بھی پڑھیں: ’وہ کسی اور کا ہوگا تو قیامت ہوگی‘، گرل فرینڈ کی شادی کسی اور سے طے پانے پر باڈی بلڈر عاشق نے خود کشی کرلی
رینوکا کے اہلِ خانہ نے خودکشی کے دعوے کو مسترد کرتے ہوئے واقعے کو مشکوک قرار دیا ہے۔ ان کا مؤقف ہے کہ خاتون کے ساتھ ہوٹل آنے والے شخص کے کردار کی مکمل تحقیقات کی جائیں کیونکہ انہیں قتل کا شبہ ہے۔
پولیس نے مقدمہ درج کر کے تفتیش کا آغاز کر دیا ہے۔ سی سی ٹی وی فوٹیج، موبائل فون کا ریکارڈ اور ہوٹل سے متعلق دیگر شواہد کا جائزہ لیا جا رہا ہے جبکہ لاش کو پوسٹ مارٹم کے لیے منتقل کر دیا گیا ہے۔
یہ بھی پڑھیں: بھارت: بیٹی کو قتل کرکے خود کشی کا رنگ دینے والا باپ گرفتار
پولیس حکام کا کہنا ہے کہ تفتیش میں خودکشی اور قتل، دونوں پہلوؤں کو مدنظر رکھا جا رہا ہے اور موت کی اصل وجہ فرانزک شواہد اور پوسٹ مارٹم رپورٹ موصول ہونے کے بعد ہی واضح ہو سکے گی۔
