اسلام آباد میں ایک خاتون کو مشکل صورتحال سے بچانے کی کوشش کے دوران اپنی جان کا نذرانہ پیش کرنے والے پاک فضائیہ کے گروپ کیپٹن عاصم طارق شہید کی نماز جنازہ ادا کر دی گئی جس کے بعد انہیں مکمل فوجی اعزاز کے ساتھ سپرد خاک کر دیا گیا۔
یہ بھی پڑھیں: خاتون کو بچاتے ہوئے گولی لگنے سے شہید ہونے والے گروپ کیپٹن عاصم کا قاتل گرفتار کرلیا گیا
نماز جنازہ میں پاک فضائیہ کے سربراہ ایئر چیف مارشل ظہیر احمد بابر سدھو، اعلیٰ فوجی افسران، فضائیہ کے اہلکاروں اور بڑی تعداد میں شہریوں نے شرکت کی اور شہید افسر کو خراج عقیدت پیش کیا۔
پاک فضائیہ کے سربراہ نے گروپ کیپٹن عاصم طارق شہید کی بہادری اور قربانی کو سراہتے ہوئے کہا کہ ان کا یہ اقدام پاکستان فضائیہ اور مسلح افواج کی اعلیٰ روایات کی عکاسی کرتا ہے۔
انہوں نے کہا کہ ایک بے گناہ شہری کی حفاظت کرتے ہوئے اپنی جان قربان کرنا اس بات کا ثبوت ہے کہ پاک فضائیہ کے افسران اور اہلکار صرف ملکی سرحدوں کے دفاع کے لیے ہی نہیں بلکہ اپنے شہریوں کی جان، عزت اور وقار کے تحفظ کے لیے بھی ہر وقت پرعزم رہتے ہیں۔
مزید پڑھیے: گروپ کیپٹن عاصم طارق قتل کیس: ملزم 14 روزہ شناخت پریڈ کے لیے جیل منتقل
گروپ کیپٹن عاصم طارق نے اسلام آباد میں ایک خاتون کو درپیش صورتحال میں مدد فراہم کرنے کے دوران غیر معمولی جرات اور فرض شناسی کا مظاہرہ کیا اور اسی کوشش میں شہادت کا رتبہ حاصل کیا۔
مزید پڑھیں: گروپ کیپٹن عاصم طارق کی شہادت، وزیراعظم کا شفاف تحقیقات اور ذمہ داروں کو سخت سزا دینے کا حکم
ان کی قربانی کو پاک فضائیہ اور عوامی حلقوں میں خراج تحسین پیش کیا جا رہا ہے جبکہ ان کے اہل خانہ سے اظہار تعزیت بھی کیا جا رہا ہے۔
