مصر کے فٹبال ٹیم کے ہیڈ کوچ حسام حسن نے فیفا ورلڈ کپ 2026 کے پری کوارٹر فائنل میں ارجنٹینا کے ہاتھوں 3-2 کی شکست کو ’ناانصافی‘ قرار دیتے ہوئے دعویٰ کیا ہے کہ ان کی ٹیم کو جان بوجھ کر ٹورنامنٹ سے باہر کیا گیا۔ انہوں نے کہا کہ شاید منتظمین چاہتے تھے کہ عالمی چیمپیئن ارجنٹینا اور لیونل میسی ٹورنامنٹ میں برقرار رہیں۔
اٹلانٹا میں کھیلے گئے سنسنی خیز میچ میں مصر نے عالمی چیمپیئن ارجنٹینا کے خلاف شاندار آغاز کیا اور پہلے 15 منٹ کے اندر برتری حاصل کر لی۔ دوسرے ہاف میں مصطفیٰ زیکو نے دوسرا گول کرکے مصر کو 2-0 کی مضبوط برتری دلا دی، تاہم ارجنٹینا نے زبردست واپسی کرتے ہوئے پہلے کرسٹیان رومیرو کے ذریعے خسارہ کم کیا، پھر لیونل میسی نے، جن کی پہلی ہاف میں پنالٹی بچا لی گئی تھی، ٹورنامنٹ کا اپنا 8واں گول کرکے مقابلہ برابر کردیا۔ بعد ازاں اینزو فرنانڈیز نے فیصلہ کن گول کرکے ارجنٹینا کو 3-2 سے فتح دلا دی۔
یہ بھی پڑھیں:فٹبال ورلڈ کپ: 2 گول کے خسارے کے باوجود ارجنٹینا کا آخری لمحات میں کم بیک، مصر کو ہراکر کوارٹر فائنل میں داخل
میچ کے بعد پریس کانفرنس میں حسام حسن نے کہا کہ وہ بدقسمتی کا بہانہ نہیں بنائیں گے بلکہ صاف الفاظ میں کہیں گے کہ ان کی ٹیم کے ساتھ ناانصافی ہوئی۔ ان کا کہنا تھا کہ مصر کا ایک گول ویڈیو اسسٹنٹ ریفری کی مداخلت پر منسوخ کردیا گیا، جبکہ ارجنٹینا کے فیصلہ کن گول سے قبل حمدی فتحی کی جرسی کھینچے جانے پر واضح پنالٹی بھی نہ دی گئی اور نہ ہی وی اے آر سے اس کا جائزہ لیا گیا۔
انہوں نے کہا کہ میدان میں نہ احترام نظر آیا اور نہ ہی منصفانہ کھیل۔ ان کے مطابق شاید حکام چاہتے تھے کہ عالمی چیمپیئن اور لیونل میسی ٹورنامنٹ میں آگے بڑھیں، کیونکہ بعض اوقات فٹبال میں تکنیکی معاملات سے ہٹ کر بھی عوامل اثر انداز ہوتے ہیں۔
Egypt's Coach Hossam Hassan "I will say what's on my mind regardless of the consequence, this was clearly a rigged match and the whole world saw it. And I want to say one more thing, if they want them [Argentina] to win so bad, why call everyone to come and participate?" pic.twitter.com/IviS6xkeF2
— Wanyama JK (@jwkhasndi) July 8, 2026
مصری کوچ نے اعلان کیا کہ وہ اس ناانصافی کے بعد ورلڈ کپ کے مزید میچ نہیں دیکھیں گے۔ انہوں نے میچ کے شیڈول پر بھی اعتراض کرتے ہوئے کہا کہ دوپہر 12 بجے مقابلہ رکھنا کھلاڑیوں کے ساتھ زیادتی ہے۔ اس کے باوجود انہوں نے اپنی ٹیم کی کارکردگی کو سراہتے ہوئے کہا کہ زیادہ تر مصری کھلاڑی مقامی لیگ سے تعلق رکھتے ہیں، لیکن انہوں نے محمد صلاح اور عمر مرموش سمیت عالمی معیار کی ٹیموں کا بھرپور مقابلہ کیا۔
