دفاعی چیمپیئن ارجنٹینا نے فیفا ورلڈکپ 2026 کے راؤنڈ آف 16 کے ایک سنسنی خیز مقابلے میں مصر کو 2-3 سے شکست دے کر کوارٹر فائنل میں جگہ بنا لی۔
یہ بھی پڑھیں: فیفا ورلڈ کپ 2026: میسی، ایمباپے اور ہالینڈ نے مل کر فٹبال کی 96 سالہ تاریخ بدل دی
امریکا کے شہر اٹلانٹا میں کھیلے گئے ناک آؤٹ مرحلے کے اس میچ میں دونوں ٹیموں کے درمیان زبردست مقابلہ دیکھنے کو ملا جہاں مصر نے ابتدا میں ارجنٹینا کے خلاف برتری حاصل کر کے اپ سیٹ کا امکان پیدا کردیا تھا۔
مصر نے میچ کے پہلے ہاف میں یاسر ابراہیم کے گول کی بدولت برتری حاصل کی۔ تاہم کچھ دیر بعد ارجنٹینا کو میچ میں واپسی کا سنہری موقع اس وقت ملا جب اسے پنالٹی ملی لیکن کپتان لیونل میسی اس موقعے سے فائدہ نہ اٹھا سکے۔ مصر کے گول کیپر مصطفیٰ شبیر نے شاندار دفاع کرتے ہوئے میسی کی پنالٹی روک لی۔
مصر کی جانب سے مصطفیٰ زیکو نے بھی گیند کو جال میں پہنچایا تاہم ریفری نے فاؤل کی وجہ سے گول مسترد کردیا۔ بعد ازاں مصطفیٰ زیکو نے ایک اور موقعے پر شاندار فنشنگ کرتے ہوئے مصر کی برتری 0-2 کردی۔
مزید پڑھیے: لیونل میسی کا نیا ریکارڈ : فیفا ورلڈ کپ میں سب سے زیادہ گول کرنے والے فٹبالر بن گئے
دوسرے ہاف کے آخری مرحلے میں ارجنٹینا نے شاندار واپسی کی۔ 80 ویں منٹ میں رسٹیان رومیرو کے ہیڈر گول نے ارجنٹینا کی امیدیں زندہ رکھیں جس کے بعد صرف 3 منٹ بعد لیونل میسی نے 83ویں منٹ میں گیند جال میں پہنچا کر مقابلہ برابر کر دیا جبکہ میچ کے آخری لمحات میں فرنانڈیز نے فیصلہ کن وار کرتے ہوئے تیسرا گول داغ دیا اور اس طرح ارجنٹینا 2-3 کی کامیابی کے ساتھ کوارٹر فائنل میں پہنچ گیا۔
