بھارت کی ریاست راجستھان کے شہر جے پور میں رشتوں کو شرمسار کرنے والا واقعہ پیش آیا ہے جہاں مبینہ طور پر ایک 23 سالہ بیٹی نے سرکاری نوکری اور جائیداد حاصل کرنے کی خواہش میں اپنی ماں کو قتل کر دیا۔
پولیس کے مطابق ملزمہ ایوشی نے اپنے رشتہ داروں کے ساتھ مل کر قتل کی منصوبہ بندی کی اور واردات کے بعد اسے سڑک حادثہ ظاہر کرنے کی کوشش کی، تاہم تحقیقات کے دوران یہ منصوبہ بے نقاب ہو گیا۔
ابتدائی تفتیش میں پولیس نے انکشاف کیا کہ قتل کی اس واردات میں ایوشی سمیت خاندان کے 7 افراد ملوث تھے۔ پولیس نے کارروائی کرتے ہوئے تمام ملزمان کو گرفتار کر کے مقدمہ درج کر لیا ہے۔
پولیس حکام کے مطابق واقعے کے بعد ابتدا میں یہ تاثر دیا گیا کہ خاتون کی موت ایک تیز رفتار موٹرسائیکل کی ٹکر سے ہوئی، تاہم شواہد اور تفتیش کے دوران معلوم ہوا کہ یہ ایک منظم منصوبہ بندی کے تحت کیا گیا قتل تھا۔
یہ بھی پڑھیے ہنی مون مرڈر کیس: بھارتی پولیس کی معمولی غلطی سے قتل کی ملزمہ رہا ہوگئی
پولیس کے ڈپٹی کمشنر کے مطابق پرتاپ نگر کے علاقے رویندرہ نگر کے رہائشی 45 سالہ نیرج شرما نے ابتدائی طور پر بیان دیا تھا کہ خاتون کی موت 3 جولائی کو موٹرسائیکل حادثے کے نتیجے میں ہوئی۔
تاہم مقتولہ کے بھائی راکیش نے اپنی بھانجی ایوشی اور دیگر افراد کے خلاف مقدمہ درج کرایا، جس کے بعد پولیس نے تحقیقات کا دائرہ وسیع کیا۔
تحقیقات کے دوران انکشاف ہوا کہ مقتولہ کے شوہر گزشتہ سال انتقال کر گئے تھے، جس کے بعد ہمدردی کی بنیاد پر مقتولہ کو شوہر کی جگہ سرکاری ملازمت دی گئی تھی۔
پولیس کے مطابق ایوشی چاہتی تھی کہ والد کی وفات کے بعد ملنے والی نوکری اسے دی جائے، جبکہ وہ خاندان کی جائیداد پر بھی اپنا حق حاصل کرنا چاہتی تھی۔ اس مقصد کے لیے اس نے مبینہ طور پر ماں پر دباؤ ڈالا، لیکن جب مقتولہ نے ملازمت چھوڑنے سے انکار کیا تو ایوشی نے رشتہ داروں کے ساتھ مل کر قتل کی منصوبہ بندی کی۔
پولیس کا کہنا ہے کہ قتل کے بعد ملزمان نے واقعے کو حادثہ ظاہر کرنے کی کوشش کی، لیکن شواہد کی بنیاد پر اصل حقیقت سامنے آ گئی۔
حکام کے مطابق واقعے میں ملوث تمام 7 ملزمان کو گرفتار کر لیا گیا ہے اور ان کے خلاف قانونی کارروائی جاری ہے۔
