امریکی صدر ڈونلڈ ٹرمپ کی سوشل میڈیا پر ایک ایسی ویڈیو تیزی سے وائرل ہو رہی ہے جس میں وہ دن میں کئی بار زبان پر آنے والے ملک ایران کا نام بھول گئے، زبان پھسلی یا یادداشت کا مسئلہ ہوا، لائیو گفتگو کے دوران ایران کو اسلامی جمہوریہ جاپان پکار دیا۔
سوشل میڈیا پر وائرل ہونے والے اس واقعے نے صارفین کو حیرت اور مزاح کا ایک نیا موقع فراہم کر دیا ہے، جہاں لوگ تیزی سے اس غلطی کی نشاندہی کر رہے ہیں۔ اتفاق سے امریکی صدر فوری اپنی غلطی کی اصلاح بھی نہ کر سکے۔
واقعے کا پس منظر اور ڈونلڈ ٹرمپ کا بیان
یہ دلچسپ صورتحال ترکیہ کے دارالحکومت انقرہ میں جاری نیٹو سربراہی اجلاس کے موقع پر پیش آئی جہاں یوکرینی صدر وولودیمیر زیلنسکی سے سائیڈ لائن ملاقات کے دوران ذرائع ابلاغ سے گفتگو کرتے ہوئے امریکی صدر کی زبان پھسل گئی۔
یہ بھی پڑھیں:ریپبلکن پارٹی کا ٹرمپ کی ’لادا‘ کے ساتھ فوٹو پوسٹ کرنا مذاق کیوں بن گیا؟
گفتگو کے دوران ڈونلڈ ٹرمپ نے کہا کہ ’اسلامی جمہوریہ جاپان‘ نے ہمارے بحری بیڑے ’یو ایس ایس ابراہم لنکن‘ پر 111 میزائل فائر کیے، لیکن خوش قسمتی سے ان تمام حملوں کو ناکام بنا دیا گیا۔
WOW! Trump just claimed that Japan fired 111 missiles at us. “We had 11 missiles shot by the Islamic Republic of Japan” pic.twitter.com/4KPMlcQH97
— Ed Krassenstein (@EdKrassen) July 8, 2026
سوشل میڈیا صارفین کا کہنا ہے کہ امریکی صدر نے میزائل حملوں کے معاملے پر بات کرتے ہوئے نادانستہ طور پر ایران اور جاپان کے ناموں کو ایک دوسرے کے ساتھ خلط ملط کر دیا۔
مشرقِ وسطیٰ کی موجودہ صورتحال
ٹرمپ کا یہ مضحکہ خیز بیان ایک ایسے وقت پر سامنے آیا ہے جب امریکا اور ایران کے درمیان شدید ترین کشیدگی پائی جاتی ہے۔ جنگ بندی کا معاہدہ ختم ہونے کے بعد دونوں ممالک کے درمیان فوجی ٹکراؤ کا اندیشہ بڑھ گیا ہے۔
امریکی صدر نے ایران کو کڑی تنقید کا نشانہ بناتے ہوئے کہا ’میں ایران کے اقدامات سے بالکل مطمئن نہیں ہوں، انہوں نے گزشتہ روز ہمارے بحری جہازوں پر ڈرون حملے کیے تھے۔
اس کے جواب میں ہم نے گزشتہ رات ایران کے ٹھکانوں پر شدید بمباری کی ہے اور یہ ممکن ہے کہ آج رات بھی ان پر سخت حملے کیے جائیں۔
صدر ٹرمپ کا اشارہ واضح طور پر ایران کی طرف ہی تھا، لیکن سفارتی اور عالمی سطح کے اس اہم اجلاس میں ان کی زبان کا پھسلنا اب انٹرنیٹ پر ایک بڑا موضوعِ بحث بن چکا ہے۔
