وزیراعلیٰ بلوچستان عبدالقدوس بزنجو نے ’وی وی آئی پی‘ آمدورفت کے دوران عوام کو مشکلات کے پیش نظر چیف سیکریٹری کو مراسلہ ارسال کیا ہے۔
چیف سیکریٹری کو بھیجے گئے مراسلے میں کہا گیا ہے کہ یہ امر مشاہدے میں آیا ہے کہ ’وی وی آئی پی‘ آمد ورفت کے دوران سیکیورٹی کے زیادہ انتظامات کیے جاتے ہیں ۔ سیکیورٹی کے اضافی انتظامات سے نا صرف ٹریفک متاثر ہوتی ہے بلکہ شہریوں کو بھی مشکلات کا سامنا کرنا پڑتا ہے۔
یہ بھی لکھا گیا ہے کہ اکثر دیکھنے میں آیا ہے کہ ’وی وی آئی پی‘ آمد ورفت کے دوران ایمبولینس اور فائربریگیڈ کی گاڑیاں بھی رش میں پھنس جاتی ہیں۔
مراسلے کے مطابق وزیراعلیٰ نے اپنی آمد و رفت کے دوران سیکیورٹی انتظامات کو پہلے ہی سے انتہائی محدود کر دیا ہے۔ اور یہ بھی امید ظاہر کی گئی ہے کہ عوامی مفاد کے پیش نظر گورنر بلوچستان بھی اپنی آمد ورفت کے دوران سیکیورٹی انتظامات محدود کریں گے۔
مراسلے میں کہا گیا ہے کہ صوبائی وزرا، اراکین اسمبلی، چیف سیکریٹری اور آئی جی پولیس کی آمدورفت میں سیکیورٹی انتظامات کو متناسب اور معقول کیا جائے۔ اور سیکیورٹی مانیٹرنگ کے متبادل ذرائع استعمال کیے جائیں۔
یہ بھی کہا گیا ہے کہ چیف سیکریٹری اس حوالے سے تمام متعلقہ اداروں کو ضروری ہدایت جاری کریں۔ ’وی وی آئی پی‘ آمد ورفت میں عوامی سہولت ہر صورت مقدم رکھی جائے۔
واضح رہے کہ پورے ملک میں وی وی آئی پی آمدورفت کے دوران روٹ لگا کر سڑک پر چلنے والی گاڑیوں سمیت پیدل چلنے والے لوگوں کو بھی روک لیا جاتا ہے اور اس وقت تک راستہ نہیں کھولا جاتا جب تک قافلہ اس روڈ سے گزر نہیں جاتا۔ اور ایسا کرنے سے لوگوں کو شدید مشکلات کا سامنا کرنا پڑتا ہے۔
