محکمہ موسمیات نے خبردار کیا ہے کہ 13 جولائی تک ملک کے بالائی علاقوں میں بارشوں اور آندھی کا نیا سلسلہ متوقع ہے، جبکہ 11 اور 12 جولائی کو اسلام آباد، راولپنڈی، پشاور، گوجرانوالہ، لاہور اور فیصل آباد میں شہری سیلاب کا خطرہ ہے۔
مزید پڑھیں:موسمی پیش گوئی اور قدرتی آفات سے نمٹنے کی تیاری، محکمہ موسمیات کے لیے 1.6 ارب روپے مختص
محکمہ موسمیات کے مطابق بحیرہ عرب سے آنے والی مرطوب ہوائیں اور مغربی ہواؤں کا سلسلہ ہفتے کی شام سے مزید شدت اختیار کرے گا، جس کے باعث کشمیر، خیبرپختونخوا، پنجاب، گلگت بلتستان، شمال مشرقی بلوچستان اور بالائی سندھ کے مختلف علاقوں میں بارش کا امکان ہے۔
وزیراعظم پاکستان کی ہدایت پر وفاقی وزیر برائے موسمیاتی تبدیلی و ماحولیاتی رابطہ مصدق ملک اور چیئرمین این ڈی ایم اے لیفٹیننٹ جنرل انعام حیدر ملک نے وزیراعلیٰ ہاؤس سندھ میں مون سون 2026 کے دوران ممکنہ سیلابی صورتحال اور موسمیاتی خطرات سے نمٹنے کے لیے منعقدہ اجلاس میں شرکت کی۔ pic.twitter.com/Y8hQq5TPiy
— NDMA PAKISTAN (@ndmapk) July 10, 2026
محکمہ نے خبردار کیا ہے کہ بالائی خیبرپختونخوا، گلگت بلتستان اور کشمیر کے پہاڑی علاقوں میں لینڈ سلائیڈنگ جبکہ ڈیرہ غازی خان کے برساتی نالوں میں پانی کے بہاؤ میں اضافہ ہوسکتا ہے۔
آندھی اور آسمانی بجلی سے کمزور تعمیرات، سولر پینلز، بجلی کے کھمبوں اور اشتہاری بورڈز کو بھی نقصان پہنچنے کا خدشہ ظاہر کیا گیا ہے۔
مزید پڑھیں:آج کہاں بارش ہوگی اور کہاں گرمی ستائے گی؟ محکمہ موسمیات نے پیشگوئی کر دی
محکمہ موسمیات نے سیاحوں اور مسافروں کو غیر ضروری سفر سے گریز اور احتیاط برتنے کی ہدایت کی ہے، جبکہ کہا ہے کہ بارشوں کے باعث گرمی اور حبس کی شدت میں کمی آئے گی۔
