پاکستان کی نجی فضائی کمپنی ساؤتھ ایئر نے کراچی کے جناح انٹرنیشنل ہوائی اڈے سے اپنی باقاعدہ اندرونِ ملک پروازوں کا آغاز کردیا ہے، جس سے ملک کے فضائی رابطوں میں مزید بہتری آنے کی توقع ہے۔
پاکستان ایئرپورٹس اتھارٹی کے مطابق ساؤتھ ایئر نے کراچی، تربت، کوئٹہ اور کراچی، بہاولپور، اسلام آباد کے روٹس پر پروازیں شروع کر دی ہیں۔ افتتاحی پروازیں جمعرات کی صبح کراچی سے تربت اور بہاولپور کے لیے روانہ ہوئیں۔
یہ بھی پڑھیں: نئی سعودی ایئرلائن ’فلائی ادیل‘ پاکستان کے لیے کن شہروں سے پرواز بھرے گی؟
اتھارٹی کا کہنا ہے کہ نئی فضائی سروسز سے مسافروں کو بہتر سفری سہولیات میسر آئیں گی اور ملک کے مختلف شہروں کے درمیان رابطوں کو فروغ ملے گا۔
ابتدائی مرحلے میں تربت کے لیے ہفتے میں ایک جبکہ بہاولپور کے لیے ہفتے میں تین پروازیں چلائی جائیں گی۔ فضائی کمپنی نے مستقبل قریب میں پشاور، رحیم یار خان، سکھر اور گوادر کے لیے بھی پروازیں شروع کرنے کا منصوبہ بنایا ہے۔
ساؤتھ ایئر سیاحت کے فروغ اور علاقائی انضمام کے لائسنس کے تحت کام کر رہی ہے۔ کمپنی کا کہنا ہے کہ نئی پروازوں سے سیاحت، تجارت اور ملک کے مختلف علاقوں کے درمیان روابط کو مزید مضبوط بنانے میں مدد ملے گی۔
یہ بھی پڑھیں: ملک بھر میں فضائی رابطوں کے فروغ کا فیصلہ، غیر فعال ہوائی اڈوں کی بحالی تیز کرنے کی ہدایت
فضائی کمپنی نے اپنی سروس کا آغاز جدید اے ٹی آر 72-600 طیاروں سے کیا ہے، جو کم فاصلے اور درمیانے درجے کی پروازوں کے لیے ایندھن کی بچت، مؤثر کارکردگی اور بین الاقوامی حفاظتی معیارات پر پورا اترنے کے باعث دنیا بھر میں استعمال کیے جاتے ہیں۔
ساؤتھ ایئر کی چیف ایگزیکٹو افسر نشاط فاطمہ نے کہا کہ کمپنی مستقبل قریب میں اپنے فضائی بیڑے اور روٹس کے نیٹ ورک میں مزید توسیع کرے گی تاکہ ملک کے زیادہ سے زیادہ شہر جدید فضائی سفری سہولیات سے مستفید ہو سکیں۔
انہوں نے کہا کہ ساؤتھ ایئر کا قیام صرف ایک نئی فضائی کمپنی کا اضافہ نہیں بلکہ پاکستان کے فضائی رابطوں کو مزید مضبوط بنانے کی قومی کوشش ہے۔
یہ بھی پڑھیں: پاکستان میں کتنی نئی ایئرلائنز پروازیں شروع کرنے والی ہیں؟
ان کا کہنا تھا کہ کمپنی محفوظ، بروقت اور معیاری سفری خدمات فراہم کرنے کے ساتھ ان علاقوں کو بھی قومی فضائی نیٹ ورک سے جوڑنے کے لیے پُرعزم ہے جہاں فضائی سہولیات اب تک محدود رہی ہیں۔
