بھارتی فلم انڈسٹری کے سپر اسٹار رجنی کانت کی زندگی پر مبنی بایوپک بنانے کی اطلاعات سامنے آئی ہیں۔ بھارتی میڈیا رپورٹس کے مطابق اداکار کی زیرِ تکمیل خودنوشت کو فیچر فلم کی شکل دیے جانے پر غور کیا جا رہا ہے، تاہم اس حوالے سے ابھی کوئی باضابطہ اعلان نہیں کیا گیا۔
بھارتی فلم انڈسٹری کے معروف اداکار رجنی کانت کی زندگی پر مبنی بایوپک بنانے کی اطلاعات نے مداحوں میں جوش و خروش پیدا کر دیا ہے۔
یہ بھی پڑھیں:بھارتی اداکار رجنی کانت نے صفائی کرنے والی خاتون کو سونے کی چین تحفے میں کیوں دی؟
بھارتی میڈیا رپورٹس کے مطابق رجنی کانت کافی عرصے سے اپنی خودنوشت پر کام کر رہے ہیں، جس میں ان کی ذاتی زندگی، فنی سفر، نمایاں کامیابیاں اور درپیش مشکلات کو تفصیل سے بیان کیا جائے گا۔
رپورٹس میں کہا گیا ہے کہ رجنی کانت نے اپنی خودنوشت کو فلم کی شکل دینے کے حوالے سے اپنے قریبی ساتھیوں سے بھی مشاورت کی ہے، تاہم اس منصوبے کا باضابطہ اعلان ابھی نہیں کیا گیا۔
#Rajinikanth is reportedly working on his autobiography, which will trace his journey from humble beginnings to becoming one of #India's biggest #superstars.
Reports also suggest discussions are underway about adapting the book into a feature film, although there has been no… pic.twitter.com/UkDOTlpETU
— Filmyscoops (@Filmyscoopss) July 26, 2026
رجنی کانت کی صاحبزادی سوندریا رجنی کانت اس سے قبل تصدیق کر چکی ہیں کہ ان کے والد اپنی زندگی کی کہانی قلم بند کر رہے ہیں۔ ان کے مطابق کتاب میں بنگلورو میں بس کنڈکٹر کی حیثیت سے جدوجہد سے لے کر جنوبی بھارتی فلم انڈسٹری کے سپر اسٹار بننے تک کا پورا سفر شامل ہوگا۔
انہوں نے کہا کہ یہ خودنوشت نہ صرف رجنی کانت کی زندگی کے مختلف مراحل سے پردہ اٹھائے گی بلکہ ہر کردار کے لیے ان کی محنت اور لگن کو بھی اجاگر کرے گی، اور توقع ہے کہ یہ عالمی سطح پر بھی غیرمعمولی توجہ حاصل کرے گی۔
رجنی کانت نے 5 دہائیاں قبل بنگلورو میں بس کنڈکٹر کے طور پر اپنے کیریئر کا آغاز کیا تھا اور بعد ازاں وہ تامل، تیلگو، ہندی اور کنڑ فلموں کے سب سے مقبول اداکاروں میں شمار ہونے لگے۔ انہیں بھارت کے اعلیٰ ترین سول اعزازات، پدم بھوشن، پدم وبھوشن اور دادا صاحب پھالکے ایوارڈ سے بھی نوازا جا چکا ہے۔
دوسری جانب رجنی کانت کی نئی فلم ’جیلر 2‘ 15 اکتوبر کو دنیا بھر میں ریلیز کی جائے گی، جبکہ ان کی ایک اور فلم ’دھرمن‘ بھی زیرِ تکمیل ہے۔
