سندھ حکومت نے معروف صوفی شاعر اور بزرگ حضرت شاہ عبداللطیف بھٹائیؒ کے سالانہ عرس کی مناسبت سے 29 جولائی 2026 (بدھ) کو صوبے بھر میں عام تعطیل کا اعلان کر دیا ہے۔
سندھ حکومت کے محکمہ اطلاعات کی جانب سے پیر کو جاری کیے گئے نوٹیفکیشن کے مطابق یہ تعطیل سندھ حکومت کے انتظامی کنٹرول میں کام کرنے والے تمام سرکاری دفاتر، خودمختار اور نیم خودمختار اداروں، کارپوریشنز اور بلدیاتی کونسلوں پر لاگو ہوگی۔
نوٹیفکیشن میں کہا گیا ہے کہ 14 صفر 1448 ہجری، بمطابق 29 جولائی 2026 کو حضرت شاہ عبداللطیف بھٹائیؒ کے عرس کے موقع پر صوبہ سندھ میں عام تعطیل ہوگی۔ اس فیصلے کا اطلاق سندھ حکومت کے ماتحت تمام متعلقہ اداروں پر ہوگا۔
تاہم حکومت نے واضح کیا ہے کہ ضروری اور ہنگامی نوعیت کی خدمات اس تعطیل سے مستثنیٰ ہوں گی اور معمول کے مطابق اپنی ذمہ داریاں انجام دیتی رہیں گی۔
حضرت شاہ عبداللطیف بھٹائیؒ کا سالانہ عرس ہر سال ضلع مٹیاری کے تاریخی شہر بھٹ شاہ میں واقع ان کے مزار پر عقیدت و احترام کے ساتھ منایا جاتا ہے۔ اس موقع پر ملک بھر سے ہزاروں زائرین، عقیدت مند، صوفی موسیقی کے دلدادہ اور ادبی شخصیات مزار پر حاضری دیتی ہیں اور عظیم صوفی شاعر کی شاعری، فکر اور روحانی خدمات کو خراجِ عقیدت پیش کرتی ہیں۔
