جنوبی افریقہ کی 16 سالہ طالبہ ’بوہلالے مفاہلے‘ نے خواتین اور بچوں کے تحفظ کے لیے ایک منفرد اسمارٹ بالی تیار کی ہے، جو ہنگامی صورتحال میں خاموشی سے حملہ آور کی تصویر لینے، پہننے والے کا موجودہ مقام (جی پی ایس) منتخب رابطوں یا متعلقہ اداروں تک پہنچانے اور فوری ایمرجنسی الرٹ بھیجنے کی صلاحیت رکھتی ہے۔
بوہلالے مفاہلے نے یہ ایجاد جنوبی افریقہ میں خواتین کے خلاف بڑھتے ہوئے تشدد اور انسانی اسمگلنگ کے واقعات کے پیشِ نظر تیار کی۔ بظاہر عام بالی جیسا دکھائی دینے والے اس آلے میں خفیہ کیمرہ، جی پی ایس ٹریکر اور خاموش ایمرجنسی الرٹ سسٹم نصب ہے، جو ایک بٹن دبانے پر بیک وقت فعال ہو جاتا ہے۔ اس طرح حملہ آور کی تصویر محفوظ ہونے کے ساتھ متاثرہ شخص کا مقام بھی فوری طور پر پہلے سے منتخب افراد یا امدادی اداروں تک پہنچ جاتا ہے۔
Well-done
Amazing Invention by a 16-Year-Old African Girl!A 16-year-old African girl invented a smart earring that can secretly take a photo of an attacker and send an emergency alert with your location to your chosen contacts or authorities. pic.twitter.com/otYAUcNuGS
— A2Z BOSS (@A2zboss) July 28, 2026
اس منفرد ایجاد کو جنوبی افریقہ میں منعقد ہونے والی نوجوان سائنس دانوں کی نمائش Eskom Expo for Young Scientists میں انجینئرنگ اور الیکٹرانکس کے شعبے میں کانسی کے تمغے سے بھی نوازا گیا۔ طالبہ اب اس ٹیکنالوجی کو مزید بہتر بنانے اور اسے عملی طور پر عام صارفین تک پہنچانے کے لیے سرمایہ کاروں اور شراکت داروں کے ساتھ کام کرنے کی خواہاں ہیں۔
یہ ایجاد خواتین، بچوں اور دیگر کمزور طبقات کی حفاظت کے لیے جدید ٹیکنالوجی کے استعمال کی ایک اہم مثال قرار دی جا رہی ہے، جس سے ہنگامی حالات میں فوری مدد حاصل کرنے اور حملہ آوروں کی شناخت میں مدد مل سکتی ہے۔
واضح رہے کہ ’بوہلالے مفاہلے‘ کی یہ تخلیق ابھی پروٹوٹائپ مرحلے میں ہے اور اس کی تجارتی بنیادوں پر فروخت کا آغاز نہیں ہوا۔
