’میری وفاداری عہدے سے نہیں پاکستان سے ہے‘، قومی ہاکی ٹیم کی کپتانی سے ہٹائے جانے پر عماد بٹ کا ردعمل

پاکستان ہاکی ٹیم کے سابق کپتان اور تجربہ کار مڈفیلڈر عماد بٹ نے کپتانی سے ہٹائے جانے کے بعد خاموشی توڑتے ہوئے کہا ہے کہ قیادت کی ذمہ داری ختم ہونے سے پاکستان کے لیے ان کا جذبہ اور عزم کبھی کم نہیں ہوگا۔

پاکستان ہاکی فیڈریشن نے بدھ کو اعلان کیا تھا کہ کئی برس تک قومی ٹیم کی قیادت کرنے والے عماد بٹ کو کپتانی سے ہٹا دیا گیا ہے، جبکہ تجربہ کار فارورڈ ابوبکر محمود کو قومی ٹیم کا نیا کپتان مقرر کردیا گیا ہے۔

یہ بھی پڑھیں: ورلڈ کپ کے اہم معرکے سے قبل قومی ہاکی ٹیم کی قیادت میں بڑی تبدیلی، عماد شکیل بٹ کو کپتانی سے ہٹا دیا گیا

اعلان کے بعد عماد بٹ نے سماجی رابطے کی ویب سائٹ پر اپنے پیغام میں قومی ٹیم کے ساتھ اپنے سفر، قربانیوں اور پاکستان ہاکی کی عالمی کپ تک رسائی کے تاریخی لمحے کا ذکر کیا۔

30 سالہ عماد بٹ نے کہا کہ پاکستان کی جرسی پہننا ان کے کیریئر کا سب سے بڑا اعزاز رہا ہے۔ انہوں نے کہا کہ قومی ٹیم کی عالمی کپ کے لیے تاریخی کوالیفکیشن کسی ایک فرد کی نہیں بلکہ پوری قوم اور پاکستان ہاکی کی کامیابی ہے۔

I have always sacrificed my blood, sweat, and everything I have for Pakistan. Every time I stepped onto the field, my only mission was to make my country proud, raise the Pakistani flag high, and bring happiness to my nation.

I have always played with passion, pride, courage,… pic.twitter.com/2WrgFXEER8

— Ammadbutt (@AmmadButt96) July 29, 2026

عماد بٹ نے کہا کہ انہوں نے ہمیشہ پاکستان کے لیے اپنا خون، پسینہ اور تمام توانائیاں وقف کیں۔ میدان میں اترنے کا مقصد ہمیشہ پاکستان کا نام روشن کرنا، سبز ہلالی پرچم بلند کرنا اور قوم کو خوشی دینا رہا۔

یہ بھی پڑھیں: قومی ہاکی ٹیم ورلڈ کپ کے لیے کوالیفائی کرنے کے بعد وطن واپس پہنچ گئی

انہوں نے کہا کہ وہ ہمیشہ جذبے، فخر، حوصلے اور لگن کے ساتھ کھیلتے رہے ہیں۔ آٹھ سال کے طویل وقفے کے بعد پاکستان کا ہاکی عالمی کپ کے لیے کوالیفائی کرنا ایک تاریخی کامیابی ہے اور انہیں خوشی ہے کہ وہ اس سفر کا حصہ رہے۔

عماد بٹ نے کپتانی سے ہٹائے جانے کے فیصلے کو وقار کے ساتھ قبول کرتے ہوئے کہا کہ کپتانی ایک ذمہ داری اور اعزاز تھا، لیکن پاکستان کی جرسی پہننا اس سے بھی بڑا اعزاز ہے۔

انہوں نے کہا کہ آج انہیں کپتانی سے ہٹا دیا گیا ہے، لیکن پاکستان کے لیے ان کی محبت اور جذبہ کبھی تبدیل نہیں ہوگا۔

سابق کپتان نے کہا کہ ہاکی نے انہیں عزت، پہچان، نام اور عالمی سطح پر پاکستان کی نمائندگی کا موقع دیا، جس پر وہ اللہ تعالیٰ کے شکر گزار ہیں۔

یہ بھی پڑھیں: وزیراعظم کا قومی ہاکی ٹیم کے ہر کھلاڑی کے لیے 15 لاکھ روپے انعام کا اعلان

عماد بٹ نے عزم ظاہر کیا کہ قیادت کی تبدیلی ان کی کارکردگی اور جذبے کو متاثر نہیں کرے گی۔ وہ آئندہ بھی اسی جوش، جذبے اور فائٹنگ اسپرٹ کے ساتھ پاکستان کے لیے کھیلتے رہیں گے۔

انہوں نے کہا کہ ان کی وفاداری کسی عہدے یا لقب سے نہیں بلکہ پاکستان سے ہے۔