پاکستان ہاکی فیڈریشن (پی ایچ ایف) نے ایف آئی ایچ مینز ہاکی ورلڈ کپ 2026 کے لیے 20 رکنی قومی اسکواڈ کا اعلان کر دیا ہے۔ عالمی ایونٹ 15 سے 30 اگست تک نیدرلینڈز اور بیلجیم میں کھیلا جائے گا، جہاں پاکستان کی ٹیم دنیا کی بہترین ہاکی ٹیموں کے مدمقابل ہوگی۔
قومی اسکواڈ میں تجربہ کار اور نوجوان کھلاڑیوں کا امتزاج رکھا گیا ہے۔ منتخب کھلاڑیوں میں وقار، محمد عبداللہ، محمد سفیان خان، معین شکیل، عبد الوحید اشرف رانا، عبد الحنان شاہد، ذکریا حیات، ارشد لیاقت، عدیل لطیف، احمد ندیم، غضنفر علی، عماد شکیل بٹ، محمد حماد الدین انجم، رحمان عبدل، افراز، عمر مصطفیٰ، ابوبکر محمود، علی رضا، عبد المنان اور محمد عماد شامل ہیں۔
وقار اور علی رضا کو گول کیپرز کی ذمہ داریاں سونپی گئی ہیں۔
یہ بھی پڑھیے ہاکی ورلڈ کپ کی تیاری، پاکستان ٹیم کے انتخاب کے لیے نیا معیار مقرر
قومی ٹیم کی کوچنگ اور انتظامی ذمہ داریوں کے لیے محمد اویس قرنی کو ٹیم منیجر مقرر کیا گیا ہے، جبکہ نیدرلینڈز سے تعلق رکھنے والے باب جوہان ویلڈہوف ہیڈ کوچ ہوں گے۔ برطانیہ کے کرسٹوفر جان بوون اور عدنان ذاکر اسسٹنٹ کوچز کی حیثیت سے خدمات انجام دیں گے، جبکہ اشرف سلطان ویڈیو ٹیکنیشن کے فرائض انجام دیں گے۔
پاکستان ہاکی فیڈریشن کے صدر محی الدین احمد وانی نے منتخب کھلاڑیوں اور کوچنگ اسٹاف پر اعتماد کا اظہار کرتے ہوئے کہا کہ قومی ٹیم ورلڈ کپ میں بہتر کارکردگی دکھانے کی صلاحیت رکھتی ہے اور قوم کو ٹیم کی بھرپور حوصلہ افزائی کرنی چاہیے۔
یہ بھی پڑھیے پاکستان ہاکی فیڈریشن نے قومی کھیل کی بحالی کے لیے نئی ایڈہاک کمیٹی تشکیل دیدی
پاکستان نے بین الاقوامی ہاکی کے اعلیٰ مقابلوں میں واپسی کے بعد ورلڈ کپ کے لیے کوالیفائی کیا، تاہم ٹیم حالیہ مہینوں میں مایوس کن کارکردگی کے باعث دباؤ کا شکار ہے۔ قومی ٹیم ایف آئی ایچ پرو لیگ میں اپنے تمام 16 میچز ہار کر آخری پوزیشن پر رہی، جس کے بعد عالمی سطح پر پاکستان کی مسابقتی صلاحیت اور ملکی ہاکی کے انتظامی امور پر سوالات اٹھائے گئے۔
ماہرین کے مطابق دنیا کی صفِ اول کی ٹیموں کی موجودگی میں پاکستان کو ورلڈ کپ میں سخت چیلنج کا سامنا ہوگا، تاہم نوجوان اور تجربہ کار کھلاڑیوں کا امتزاج ٹیم کے لیے بہتر نتائج کی امید بھی پیدا کرتا ہے۔
