امریکا کی ریاست فلوریڈا میں ایک خاتون ڈلیوری ڈرائیور کی انوکھی حرکت سوشل میڈیا پر توجہ کا مرکز بن گئی، جہاں اس نے گاہک کا پارسل دروازے تک رکھنے کے بجائے دور سے ہی اچھال کر برآمدے میں پھینک دیا، پھر اطمینان سے ’پروف آف ڈلیوری‘ کی تصویر کھینچی اور روانہ ہوگئی۔
میڈیا رپورٹس کے مطابق یہ واقعہ ایک گھر کے دروازے پر نصب رنگ (Ring) ڈور بیل کیمرے میں ریکارڈ ہوا۔ ویڈیو میں دیکھا جا سکتا ہے کہ خاتون ڈرائیور گھر کے قریب پہنچتی ہے، پارسل کو کنکریٹ کے فرش پر زور سے پھینکتی ہے، موبائل ڈیوائس سے تصویر لیتی ہے اور بغیر دروازے تک گئے واپس چلی جاتی ہے، جبکہ گھر کے اندر موجود کتا مسلسل بھونکتا رہتا ہے۔
Every delivery partner carries not just a package, but a customer's trust. Thanks to the homeowner's doorbell camera, careless handling didn't go unnoticed. Professionalism always matters. 📦🏡 pic.twitter.com/VlCBStygNI
— RA (@Itsam4d) August 6, 2026
فلوریڈا کے رہائشی نیتھن پیکاس نے بتایا کہ پارسل Yun Express نامی تھرڈ پارٹی کمپنی کے ذریعے پہنچایا گیا تھا، جو بعض اوقات Amazon کی جانب سے بھی ڈلیوریز کرتی ہے۔ انہوں نے پارسل کی تصویر بھی شیئر کی، جس میں ڈبے کا ایک کونا دبا ہوا دکھائی دیتا ہے۔
گاہک نے طنزیہ انداز میں کہا کہ شاید فلوریڈا کی شدید گرمی نے ڈرائیور کو دروازے تک جانے کے ’اضافی دو قدم‘ چلنے سے بھی روک دیا۔
واقعے کی ویڈیو وائرل ہونے کے بعد ایمیزون نے بیان جاری کرتے ہوئے کہا کہ یہ طرزِ عمل اس کے ڈلیوری پارٹنرز کے مقررہ معیار کی عکاسی نہیں کرتا اور معاملے کی تحقیقات کی جا رہی ہیں۔
یہ بھی پڑھیں:ایمازون پر ملازمین چرانے کا الزام، وارنر برادرز نے عدالت میں بڑا مقدمہ دائر کردیا
تاہم یہ واضح نہیں ہو سکا کہ پارسل کے اندر موجود سامان کو کوئی نقصان پہنچا یا نہیں، اور نہ ہی یہ معلوم ہو سکا کہ متعلقہ ڈرائیور اب بھی ایمیزون کی ڈلیوریز انجام دے رہا ہے یا نہیں۔
یہ پہلا موقع نہیں کہ کسی ڈلیوری ڈرائیور کی ویڈیو وائرل ہوئی ہو۔ گزشتہ ماہ امریکی ریاست جارجیا میں ایک FedEx ڈرائیور ’پروف آف ڈلیوری‘ کی تصویر لیتے ہوئے توازن کھو بیٹھا تھا اور سیدھا گھر کے سامنے موجود سوئمنگ پول میں جا گرا تھا، جس کی ویڈیو بھی سوشل میڈیا پر خوب گردش کرتی رہی۔
