.
.
جی ٹی روڈ پر ٹیکسلا بائی پاس کے قریب موٹر سائیکل سوار نے کار سوار بہنوں پر فائرنگ کردی، گاڑی بے قابو ہو کر ڈمپر سے جا ٹکرائی؛ پولیس نے مقدمہ درج کرکے تفتیش شروع کردی۔
پولیس ذرائع کے مطابق ٹیکسلا تھانے کی حدود میں جی ٹی روڈ پر بائی پاس کے قریب ایک خاتون ٹک ٹاکر عائشہ گلمینہ کو دن دہاڑے فائرنگ کرکے قتل کردیا گیا جبکہ اس کی نوعمر بہن شدید زخمی ہوگئی۔ مقتولہ اپنے گھر والوں کے ہمراہ کار میں سفر کر رہی تھی کہ 30 سال کی عمر کے لگ بھگ ایک موٹر سائیکل سوار نے انہیں روک کر فائرنگ کردی۔ گولیاں لگنے سے دونوں بہنیں زخمی ہوئیں جبکہ کار بے قابو ہوکر ایک ڈمپر سے جا ٹکرائی۔
یہ بھی پڑھیے اسلام آباد میں ٹک ٹاکر مبینہ طور پر شوہر کے ہاتھوں قتل
فائرنگ کے نتیجے میں کانٹینٹ کری ایٹر موقع پر ہی دم توڑ گئی جبکہ اس کی بہن کی حالت تشویش ناک بتائی گئی ہے۔ مقتولہ کی لاش تحصیل ہیڈکوارٹرز اسپتال ٹیکسلا منتقل کردی گئی، جبکہ شدید زخمی بہن کو علاج کے لیے اسلام آباد منتقل کیا گیا۔
یہ بھی پڑھیے چترال سے تعلق رکھنے والی ٹک ٹاکر کو اسلام آباد میں قتل کردیا گیا
پولیس کے مطابق مقتولہ کا تعلق ہری پور سے تھا اور وہ ایک نجی ہاؤسنگ سوسائٹی میں رہائش پذیر تھی۔ مقتولہ کے بھائی نے ایف آئی آر میں دو افراد کو نامزد کرتے ہوئے مؤقف اختیار کیا کہ خاتون اور ملزمان کے درمیان رقم کا تنازع تھا، جس کی وجہ سے مبینہ طور پر ٹارگٹ کلنگ کی گئی۔ پولیس نے نامزد ملزمان کے خلاف مقدمہ درج کرکے مزید تفتیش شروع کردی ہے۔
