۔
۔
بھارتی ریاست اتر پردیش کے شہر آگرہ میں ایک شخص نے مبینہ طور پر اپنی ایک سالہ بیٹی کو دریائے جمنا میں پھینک دیا۔ واقعہ بدھ کے روز اکبرا یمنا پل پر پیش آیا، جہاں ملزم رنکو اپنی اہلیہ لکشمی اور بیٹی کے ہمراہ موٹر سائیکل پر آگرہ جا رہا تھا۔ پولیس کے مطابق راستے میں میاں بیوی کے درمیان کسی بات پر جھگڑا بھی ہوا تھا۔
لکشمی کے بیان کے مطابق رنکو نے پل پر موٹر سائیکل روک کر کہا کہ وہ بیٹی کے ساتھ سیلفی لینا چاہتا ہے۔ وہ بچی کو لے کر پل کی ریلنگ کے قریب گیا، تصویر کھینچی اور مبینہ طور پر اسے دریائے جمنا میں پھینک دیا۔ لکشمی نے شوہر کی جانب بڑھنے کی کوشش کی تو رنکو نے اسے بھی پل سے دریا میں دھکیلنے کی کوشش کی۔
لکشمی کی چیخ پکار سن کر راہ گیر جمع ہوگئے۔ جب انہیں واقعے کا علم ہوا تو مشتعل ہجوم نے رنکو کو پکڑ کر تشدد کا نشانہ بنایا اور بعد ازاں پولیس کے حوالے کردیا۔ واقعے کے دوران تشدد کی ایک ویڈیو بھی سوشل میڈیا پر گردش کر رہی ہے۔
لکشمی کی شکایت پر سکندرا تھانے میں مقدمہ درج کرلیا گیا ہے، جبکہ پولیس کی نگرانی میں پی اے سی کے غوطہ خور دریائے جمنا میں بچی کی تلاش کر رہے ہیں۔ رپورٹ کے وقت تک ایک سالہ بچی کا سراغ نہیں مل سکا تھا۔ پولیس نے واقعے کی تحقیقات شروع کردی ہیں اور مزید تفصیلات حکام کی جانب سے سامنے آنے کا انتظار ہے۔
