پاکستان میں روس کے سفیر البرٹ خوریف نے نائب وزیراعظم اور وزیرِ خارجہ سینیٹر محمد اسحاق ڈار سے ملاقات کی ہے۔ ملاقات کے دوران دونوں رہنماؤں نے پاک روس دوطرفہ تعلقات میں پیشرفت کا جائزہ لیا اور علاقائی امن و استحکام کے لیے سفارتی حل اور مذاکرات کے تسلسل پر زور دیا۔
نائب وزیراعظم اور وزیرِ خارجہ سینیٹر محمد اسحاق ڈار سے پاکستان میں تعینات روس کے سفیر البرٹ خوریف نے ملاقات کی، جس میں باہمی دلچسپی کے امور اور علاقائی صورتحال پر تفصیلی تبادلہ خیال کیا گیا۔
یہ بھی پڑھیے پاکستان روس تعلقات میں بڑی پیشرفت، اویس لغاری نے نئی حکمتِ عملی دنیا کے سامنے رکھ دی
ملاقات کے دوران نائب وزیراعظم و وزیرِ خارجہ نے پاک روس دوطرفہ تعلقات میں آنے والے مثبت موڑ اور بڑھتی ہوئی پیشرفت کو سراہا۔ انہوں نے دونوں ممالک کے درمیان تعلقات کو مزید مستحکم کرنے کے لیے اہم اور کلیدی شعبوں میں تعاون کے فروغ کے ساتھ ساتھ اعلیٰ سطحی رابطوں اور ملاقاتوں کے تسلسل کی اہمیت پر خصوصی زور دیا۔
یہ بھی پڑھیے پاکستان روس کے ساتھ توانائی اور بارٹر تجارت کے شعبوں میں تعاون کے فروغ کا خواہاں
ملاقات میں علاقائی پیشرفت اور اہم بین الاقوامی امور بھی زیرِ بحث آئے۔ اس موقع پر نائب وزیراعظم نے پاکستان کے اس دیرینہ اور اصولی موقف کا اعادہ کیا کہ تنازعات کے حل، اختلافات کو دور کرنے اور خطے میں پائیدار امن و استحکام کے فروغ کے لیے صرف مذاکرات اور سفارت کاری ہی واحد حل ہیں۔
