وفاقی حکومت نے عوام کو خوشخبری سنائی ہے کہ ڈیزل کی قیمت میں 30 سے 32 روپے فی لیٹر کمی کا امکان ہے، جس کا اعلان آج کر دیا جائےگا۔
وفاقی وزیر پیٹرولیم علی پرویز ملک نے وزیر اطلاعات عطااللہ تارڑ کے ہمراہ اسلام آباد میں پریس کانفرنس کرتے ہوئے کہا کہ خطے میں جنگ کی وجہ سے جس قسم کے مسائل اور تکلیف ہمارے معاشرے کے اندر آئی ہوئی ہے، حکومت کو اس کا پوری طرح احساس ہے۔
یہ بھی پڑھیں: پیٹرولیم مصنوعات کی قیمتوں میں اضافہ، پیٹرول 3 روپے 34 پیسے، ڈیزل 5 روپے 27 پیسے مہنگا
علی پرویز ملک نے کہا کہ اس تکلیف کو مدھم کرنے کے لیے حکومت اپنے محدود وسائل کے اندر جو بھی کوشش کرسکتی ہے، وزیراعظم شہبازشریف ایک منٹ ضائع کیے بغیر اس کے لیے احکامات جاری کرتے ہیں۔
انہوں نے کہا کہ عوام کو ٹارگٹڈ سبسڈی کے ذریعے بھی ریلیف فراہم کیا گیا، جبکہ مشکل وقت ضرور ختم ہوگا اور حکومت عوامی مسائل کے حل کے لیے کوشاں ہے۔
علی پرویز ملک کے مطابق بین الاقوامی مارکیٹ میں خام تیل کی قیمت میں اضافہ ہوا ہے، جبکہ تیل پیدا کرنے والے ملک روس کو بھی مشکلات کا سامنا ہے۔
یہ بھی پڑھیں: پیٹرولیم مصنوعات کی قیمتوں میں روزانہ ردوبدل ختم کرنے کی تجویز سامنے آگئی
انہوں نے بتایا کہ وزیراعظم کی ہدایت پر آئل ریفائنریز کے حکام کے ساتھ دو تین نشستیں ہوچکی ہیں، جن میں ڈیزل کی قیمت میں کمی کے حوالے سے بات چیت کی گئی۔
وفاقی وزیر پیٹرولیم نے کہا کہ آئل ریفائنریز نے ڈیزل کی قیمت میں نمایاں کمی کی یقین دہانی کرائی ہے اور ڈیزل کی قیمت میں 30 سے 32 روپے فی لیٹر تک کمی کا امکان ہے۔
علی پرویز ملک نے حکومت کے ساتھ تعاون پر آئل ریفائنریز کا شکریہ ادا کرتے ہوئے کہا کہ حکومت کی کوشش ہے کہ مشکل حالات میں عوام کو زیادہ سے زیادہ ریلیف فراہم کیا جائے۔
یہ بھی پڑھیں: پیٹرولیم مصنوعات کی قیمتوں کے نئے فارمولے کے بعد خام تیل کتنا سستا ہوا، پیٹرول اور ڈیزل کی قیمتوں میں کتنی کمی آئی؟
اس موقع پر وزیراطلاعات عطاتارڑ نے کہا کہ وزیراعظم نے آج ہونے والے اجلاس میں آئل ریفائنریز کے ساتھ مذاکرات کرنے کی ہدایت کی ہے۔ وزیراعظم کی واضح ہدایت ہے کہ عوام کو ہر ممکن ریلیف فراہم کیا جائے۔
انہوں نے کہا کہ اوگرا کی جانب سے آج ڈیزل کی قیمتوں میں کمی کا اعلان کیا جائے گا۔ ڈیزل کی قیمت میں کمی سے کاشت کاروں اور ٹرانسپورٹرز کو ریلیف ملے گا۔
عطا اللہ تارڑ نے کہا کہ خطے میں جنگ کے باعث دنیا بھر میں تیل کی قیمتوں میں اضافہ ہوا، تاہم حکومت عوام کو ریلیف دینے کے لیے اقدامات کررہی ہے۔ آئندہ دنوں میں عوام کو مزید خوش خبریاں ملیں گی۔
