پاکستان اسٹاک ایکسچینج میں جمعہ کو کاروبار کے دوران تیزی کا رجحان برقرار رہا اور بینچ مارک کے ایس ای 100 انڈیکس دوپہر تک 510 پوائنٹس سے زائد اضافے کے ساتھ 177,800 کی سطح عبور کرگیا۔
دوپہر 12 بجے کی مارکیٹ اپ ڈیٹ کے مطابق کے ایس ای 100 انڈیکس 510.34 پوائنٹس یعنی 0.29 فیصد اضافے کے بعد 177,833.12 پوائنٹس کی سطح پر پہنچ گیا، جبکہ کاروبار کے دوران اب تک 97.94 ملین سے زائد حصص کے سودے ہوئے۔
یہ بھی پڑھیں: پاکستان کے زرعی شعبے میں نیا انقلابی موڑ، پھلوں کا پہلا برآمد کنندہ اسٹاک ایکسچینج کی فہرست پر لسٹنگ کے لیے تیار
مارکیٹ میں خریداری کا رجحان بالخصوص آٹو موبائل اسمبلرز، آئل اینڈ گیس ایکسپلوریشن کمپنیوں، آئل مارکیٹنگ کمپنیوں، بجلی پیدا کرنے والی کمپنیوں اور ریفائنریز کے شعبوں میں دیکھا گیا۔
انڈیکس پر نمایاں وزن رکھنے والے کئی حصص بھی مثبت زون میں کاروبار کرتے رہے، جن میں اٹک ریفائنری، حب پاور، ماری پیٹرولیم، او جی ڈی سی ایل، پاکستان پیٹرولیم لمیٹڈ، پاکستان اسٹیٹ آئل، حبیب بینک اور نیشنل بینک شامل ہیں۔
Market is up at midday 🚀
⏳ KSE 100 is positive by +510.34 points (+0.29%) at midday trading. Index is at 177,833.12 and volume so far is 97.94 million shares (12:00 PM) pic.twitter.com/a00rXCiLil— Investify Pakistan (@investifypk) August 28, 2026
واضح رہے کہ جمعرات کو پاکستان اسٹاک ایکسچینج میں کاروبار مجموعی طور پر اتار چڑھاؤ کا شکار رہا تھا۔
ابتدائی تیزی کے بعد کاروبار کے آخری مرحلے میں منافع کے حصول کے لیے ہونے والی فروخت نے مارکیٹ کی ابتدائی برتری ختم کردی تھی۔
مزید پڑھیں: پاکستان اسٹاک مارکیٹ کی تاریخی بلندی کا ملک کی معیشت سے کتنا تعلق ہے؟
جس کے نتیجے میں کے ایس ای 100 انڈیکس 47.93 پوائنٹس یعنی 0.03 فیصد کمی کے بعد 177,322.78 پوائنٹس پر بند ہوا تھا۔
دوسری جانب عالمی سطح پر بھی جمعہ کو ایشیائی اسٹاک مارکیٹوں میں محتاط رجحان دیکھا گیا۔
امریکا کی معروف ٹیکنالوجی کمپنی اینویڈیا کے مضبوط مالی نتائج کے بعد ٹیکنالوجی اسٹاکس میں آنے والی تیزی کے باوجود سرمایہ کار امریکی شرح سود سے متعلق پالیسی اشاروں کے منتظر ہیں۔
عالمی منڈی میں خام تیل کی قیمتیں بھی ہفتہ وار بنیاد پر کمی کی جانب گامزن ہیں۔ برینٹ خام تیل کی قیمت 0.1 فیصد کم ہوکر 89.63 ڈالر فی بیرل ہوگئی اور رواں ہفتے اس کی قیمت میں 5 فیصد سے زائد کمی کا امکان ہے۔
مزید پڑھیں: سرمایہ کاروں کا اعتماد اسٹاک ایکسچینج میں بہتری کا باعث، کیا معیشت مستحکم ہورہی ہے؟
ایشیائی مارکیٹوں میں ایم ایس سی آئی ایشیا پیسیفک انڈیکس میں 0.1 فیصد، جاپان کے نکی انڈیکس میں 0.5 فیصد اور تائیوان کی اسٹاک مارکیٹ میں 1.2 فیصد اضافہ ہوا، جبکہ جنوبی کوریا کا کوسپی ایک فیصد اور ہانگ کانگ کا ہینگ سینگ 0.3 فیصد نیچے رہا۔
عالمی سرمایہ کاروں کی توجہ اب امریکی فیڈرل ریزرو کے جیکسن ہول سمپوزیم پر مرکوز ہے، جہاں فیڈرل ریزرو کے چیئرمین کیون وارش آج خطاب کریں گے۔ شرح سود کے آئندہ فیصلوں سے متعلق ان کے اشارے عالمی مالیاتی منڈیوں کی سمت پر اثرانداز ہوسکتے ہیں۔
