اسکاٹش گرینز نے اسکاٹ لینڈ کی حکومت سے مطالبہ کیا ہے کہ اسرائیل کے خلاف بائیکاٹ اور پابندیوں کے اقدامات مکمل طور پر نافذ کیے جائیں اور فلسطینیوں سے متعلق پالیسی میں واضح عملی اقدامات کیے جائیں۔
اسکاٹش گرینز کے رکن پارلیمنٹ پیٹرک ہاروی نے کہا کہ حکومت کے آئندہ حکومتی پروگرام میں اسرائیل کے خلاف واضح اقدامات اور فلسطینیوں کے حقوق کے تحفظ کے لیے عملی منصوبہ شامل ہونا چاہیے۔
یہ بھی پڑھیں: اسرائیل پر پابندیاں عائد کی جائیں، دنیا بھر کی 450 سے زائد یہودی شخصیات کی اپیل
انہوں نے کہا کہ اسکاٹش حکومت کو ان کمپنیوں کے ساتھ معاہدے ختم کرنے چاہئیں جنہیں اقوام متحدہ کے انسانی حقوق کے سربراہ وولکر ترک نے مقبوضہ مغربی کنارے میں اسرائیلی بستیوں کی سرگرمیوں میں ملوث قرار دیا ہے۔
اسکاٹش گرینز نے مقامی حکومتوں کو فلسطینی قیادت میں چلنے والی بائیکاٹ، سرمایہ کاری سے دستبرداری اور پابندیوں کی تحریک کی حمایت کے لیے مزید اختیارات دینے کا بھی مطالبہ کیا ہے۔
پیٹرک ہاروی نے الزام عائد کیا کہ اسکاٹش حکومت نے فلسطینی معاملے پر اپنے بیانات کو عملی اقدامات میں تبدیل نہیں کیا اور اب تک بامعنی تبدیلی کے بہت کم شواہد سامنے آئے ہیں۔
یہ بھی پڑھیں: بیلجیم نے فلسطین کو تسلیم کرنے اور اسرائیل پر پابندیاں عائد کرنے کا اعلان کردیا
ان کا کہنا تھا کہ اگر کوئی کمپنی فلسطینیوں کے خلاف مبینہ مظالم سے فائدہ اٹھا رہی ہے تو اسکاٹش حکومت کو اپنے تمام دستیاب اختیارات استعمال کرتے ہوئے اس بات کو یقینی بنانا چاہیے کہ ایسی کمپنی کو عوامی رقم سے بھی فائدہ نہ پہنچے۔
انہوں نے کہا کہ روس کی جانب سے یوکرین کے خلاف جنگ شروع ہونے کے بعد اسکاٹش حکومت نے کاروباری اداروں کے لیے رہنما اصول جاری کیے تھے اور نجی شعبے کو اپنا کردار ادا کرنے کی ہدایت کی تھی۔
پیٹرک ہاروی کے مطابق اسکاٹش حکومت پہلے ہی ثابت کرچکی ہے کہ وہ چاہے تو اقدامات کرسکتی ہے، فلسطینی بھی اس سے کم کے مستحق نہیں۔
یہ بھی پڑھیں: فلسطینیوں کو بھوکا مارنے پر فرانس کی اسرائیل پر پابندیاں عائد کرنے کی دھمکی
دوسری جانب اسکاٹش حکومت کے ترجمان نے کہا کہ اسکاٹش حکومت ان اولین حکومتوں میں شامل تھی جنہوں نے غزہ میں جنگ بندی کا مطالبہ کیا اور وہ امن، انصاف اور انسانی حقوق کے لیے واضح اور مستقل مؤقف رکھتی ہے۔
ترجمان کے مطابق حکومت نے اپنے اختیارات کے دائرے میں فلسطینی عوام کی تکالیف کے خاتمے اور فوری و پائیدار حل کے لیے دستیاب ’سب سے براہ راست اور مؤثر اقدامات‘ کیے ہیں۔
