بلوچستان کے ضلع نوشکی میں پولیس نے احمدوال کے علاقے میں کمسن بچی کے قتل و مبینہ زیادتی کے کیس میں اہم پیشرفت کرتے ہوئے مقدمے میں نامزد تینوں ملزمان کو گرفتار کر لیا۔
ترجمان بلوچستان پولیس کے مطابق کمسن بچی بی بی صبیہ دختر اللہ داد، عمر 8 سال، کی لاش برآمدگی سے متعلق درج مقدمے میں اہم پیشرفت ہوئی ہے۔
ترجمان پولیس کے مطابق ڈی آئی جی پولیس رخشان رینج عبدالحئی بلوچ اور ایس پی نوشکی سلیم شاہوانی کی ہدایات پر ایس ایچ او تھانہ احمدوال کی سربراہی میں پولیس نے کارروائی کرتے ہوئے مقدمے میں نامزد تینوں ملزمان کو گرفتار کرلیا۔
گرفتار ملزمان میں عصمت اللہ ولد نور محمد، زبیر ولد محمد بلال سکنہ احمدوال اور کامران ولد حبیب اللہ سکنہ کلی بھٹو شامل ہیں۔
ترجمان بلوچستان پولیس کے مطابق تمام ملزمان کو قانون کے مطابق گرفتار کیا گیا ہے، جبکہ واقعے کی مزید تفتیش جاری ہے۔
